Алматыда Qazaqstan IGF 2024 интернетті басқару бойынша екінші ұлттық форум өтеді
2024 жылдың 16 қазанында Алматыда SmArtPoint IT хабында Qazaqstan IGF 2024 интернетті басқару жөніндегі ұлттық форумның екінші жиыны өтеді. Бұл шара Қазақстанда қауіпсіз және ашық цифрлық кеңістікті дамытуға ықпал етеді. Форум Біріккен Ұлттар Ұйымының Бас хатшылығының қолдауымен төрт құрлықтағы 106 елде өтетін жаһандық IGF бастамасының бір бөлігі болып табылады.
Форумға мемлекеттік органдар, жеке сектор, азаматтық қоғам және академиялық ортадан 200-ден астам сарапшы қатысып, интернет пен киберқауіпсіздікке қатысты өзекті мәселелерді талқылайды. Шара барысында келесі тақырыптар қаралады:
- Интернетті тұрақты даму мақсаттарына жету құралы ретінде басқару;
- Жасанды интеллект дәуіріндегі жеке деректердің құпиялылығы;
- Криптовалюталар мен олардың реттелуі;
- Цифрлық теңсіздікті азайту үшін жеке байланыс желілері;
- Парламенттік бастамалар: цифрлық заңнаманы жүйелеу;
- Қазақстанның цифрлық болашағындағы әйелдердің рөлі;
- Онлайн платформаларды ұлттық реттеу.
Сонымен қатар, форумда Digital Rights Center Qazaqstan (DRCQ) сарапшылары жасаған «Цифрлық құқықтарды сақтау рейтингі 2024» ұсынылады. Бұл рейтинг телекоммуникация, финтех және электронды сауда салаларындағы корпоративтік басқару, пікір білдіру еркіндігі және құпиялылық көрсеткіштеріне негізделген.
Форумды Eurasian Digital Foundation және DRCQ Қазақстанның цифрлық даму, инновациялар және аэроғарыш өнеркәсібі министрлігі, Digital Paradigm қоры, Maqsut Narikbayev University және BlockchainKZ қауымдастығының қолдауымен ұйымдастырады.
Бұл бастама БҰҰ-ның тұрақты даму мақсаттарына, атап айтқанда, өнеркәсіп, инновация және инфрақұрылымды дамыту (#9) және тұрақты даму үшін серіктестік орнату (#17) қағидаларына сәйкес келеді.
Шараның операторы Eurasian Digital Foundation цифрлық құқықтарды қорғауға және Қазақстан мен Еуразиялық аймақта интернетті зерттеуді дамытуға бағытталған. Қосымша ақпаратты Eurasian Digital Foundation мен Qazaqstan IGF-тің Instagram, Facebook парақшаларынан, сондай-ақ Qazaqstan IGF Telegram арнасы мен ресми сайтынан алуға болады.