Қазақстан инновацияларды енгізу үшін Қытайдың «Роботтар аңғары» тәжірибесін зерттейді
Қытайға жұмыс сапары аясында Қазақстан Премьер-Министрі Олжас Бектенов «Роботтар аңғары» ретінде танымал Чжанцзян ғылыми қалашығын аралап, қытай робототехникасының соңғы жетістіктерімен танысты. 80-нен астам компанияны біріктіретін ғылыми-технологиялық орталықта медицина мен білім беруден бастап құтқару операциялары мен өнеркәсіпке дейін әртүрлі салаларда қолданылатын гуманоидты және арнайы роботтар көрсетілді.
Премьер-Министр Цифрлық даму министрлігіне робототехника саласындағы озық тәжірибені алу және оны Қазақстанда қолдану мақсатында қытайлық әріптестермен ынтымақтастық орнатуды тапсырды.
Сапар барысында қазақстандық және қытайлық компаниялар арасында $2,5 млрд сомаға келісімдерге қол қойылды. Делегация SenseTime компаниясының кеңсесіне де барып, ақылды және қауіпсіз қала құруға арналған заманауи шешімдермен танысты.