Қазақстанда авторлық құқықтарды басқаруға арналған цифрлық платформаны құру мәселесі талқыланып жатыр
Сенат зияткерлік меншік жүйесін цифрландыру мен ашықтыққа бағытталған заңды мақұлдады.
Құжаттың басты жаңалығы — авторларға төленетін сыйақылар, шығармаларды пайдалану құқықтары және осы құқықтарды басқаратын ұйымдармен жасалған шарттар туралы деректер сақталатын әрі өңделетін бірыңғай цифрлық платформаның енгізілуі.
Бұл платформа авторлар мен құқық иелеріне өз контентінің қалай пайдаланылып жатқанын және сыйақының қашан есептелетінін нақты уақытта бақылауға мүмкіндік береді. Бұл өз кезегінде ұжымдық құқықтарды басқару жүйесіне деген сенімді арттырады.
Цифрлық жүйені Әділет министрлігіне қарасты Зияткерлік меншік ұлттық институты басқарып, сүйемелдейтін болады.
Сонымен қатар, заң тауар белгілерін және патенттерді тіркеу рәсімін жеделдетеді — енді сараптамадан өту электрондық рәсімдер арқылы бірнеше есе жылдам жүзеге асады.
Бұл реформа зияткерлік меншік саласын ашық, заманауи және технологиялық етуге, ал авторлардың құқықтарын неғұрлым тиімді қорғауға бағытталған.