Қазақстанда интернетке шектеулі қолжетімділігі бар балаларға арналған SIM-карталар енгізіледі

Қазақстан Республикасы Оқу-ағарту министрлігі мемлекеттік органдармен бірлесіп, ата-ана бақылауы бар балаларға арналған SIM-карта жүйесін әзірлеуде. Вице-министр Еділ Оспанның айтуынша, бұл жаңашылдық кешенді жоспарға енгізілген, ал байланыс операторлары осындай SIM-карталарды шығару міндетін алады.

“Біз операторлар балаларға арналған арнайы SIM-карталарды шығаруы тиіс деп есептейміз. Яғни, ата-аналар өз балалары үшін осы арнайы SIM-карталарды сатып алуға міндетті болады”, – деді Еділ Оспан.

Балаларға арналған SIM-карталар қажетсіз контент пен әлеуметтік желілерге қолжетімділікті шектеуге, сондай-ақ мобильді қосымша арқылы баланың орналасқан жерін бақылауға мүмкіндік береді. Қазіргі уақытта Қазақстанда шектеулі қолжетімділігі бар тарифтер бар, бірақ ұсынылып отырған бастама балалардың цифрлық қауіпсіздігін жоғары деңгейде қамтамасыз етеді.

Министрлік атап өткендей, мұндай SIM-карталар көптеген елдерде қолданылады және ата-аналарға балаларының мобильді құрылғыларды пайдалануын бақылауға көмектеседі.

“Халықаралық тәжірибе көрсеткендей, балаларға арналған SIM-карталар байланыс операторлары тарапынан кеңінен қолдау табуда және цифрлық қауіпсіздік саласындағы мемлекеттік бастамалармен қатар жүреді. Бұл ата-аналарға балалардың телефонды пайдалануын тиімді бақылауға мүмкіндік береді. Қазақстанда кейбір операторлар білім беру ресурстарына ғана қолжетімді тарифтер ұсынады, бірақ балалардың интернеттегі қауіпсіздігін толық бақылау мүмкін емес. Ұсынылып отырған бастама интернеттегі балалар қауіпсіздігін бақылауды кеңейтіп, ата-аналарға цифрлық кеңістікте өз балаларын жоғары деңгейде қорғауға мүмкіндік береді”, – деді Еділ Оспан Орталық коммуникациялар қызметінде өткен брифингте.

TSARKA қолдауымен