Қазақстанда өнеркәсіптік қауіпсіздікті бақылауға арналған цифрлық жүйе құрылады
Президент тапсырмасы бойынша қауіпті өндірістердегі қауіпсіздікті қамтамасыз ету шаралары күшейтіледі.
Премьер-министр Олжас Бектенов жұмыс кеңесін өткізіп, өнеркәсіптік қауіпсіздікті цифрландырудың жаңа тәсілдерін қарастырды. Төтенше жағдайлар, өнеркәсіп, құрылыс, еңбек және цифрлық даму министрлері еңбекті қорғау саласында атқарылып жатқан жұмыстар туралы есеп берді.
Негізгі шаралар:
• Өндірістерді цифрландыруды ескере отырып, нормативтік актілерді қайта қарау.
• Апаттық-құтқару қызметтеріне қойылатын талаптарды қатаңдату.
• Кәсіпорындардағы қауіпсіздік бақылау нормативтерін күшейту.
• Қауіпті нысандардағы жабдықтарды жаңарту және модернизациялау.
“E-КПБ” жүйесін іске қосу
Маңызды шешімдердің бірі – “E-КПБ” ақпараттық жүйесін әзірлеу және енгізу. Бұл жүйе апаттарды есепке алуды автоматтандыруға, өнеркәсіптік нысандардың цифрлық паспорттарын жүргізуге және қауіпсіздік нормаларының сақталуын бақылауды жақсартуға мүмкіндік береді.
IT-мамандар жұмысқа қосылады
Цифрлық даму министрлігіне қазақстандық IT-компаниялармен бірлесіп, өнеркәсіптік қауіпсіздікке бақылауды күшейтуге арналған жаңа цифрлық шешімдерді әзірлеу тапсырылды.
Қосымша шаралар:
• ТЖМ, Өнеркәсіп министрлігі және басқа да ведомстволар жер қойнауын пайдаланушылардың тау-кен жұмыстарын талдап, қауіпсіздік шараларын уақытылы қаржыландыруды қамтамасыз етеді.
• Шахталардағы газ бөліну қаупін азайту үшін дегазацияға қатысты жаңа нормативтер енгізіледі.
• Кәсіпорын иелерінің қызметкерлердің еңбек жағдайына жауапкершілігі күшейтіледі.