Қазақстанда полицияға жедел жүгіну үшін цифрлық сервис іске қосылды
ҚР Ішкі істер министрлігі Egov Mobile қосымшасында «Заң және Тәртіп» атты жаңа сервисті іске қосты. Енді пайдаланушылар тәулік бойы полицияға тікелей құқықбұзушылықтар туралы хабарлай алады — соның ішінде қоғамдық тәртіпті бұзу, отбасылық зорлық-зомбылық немесе жол-көлік оқиғалары туралы.
EGov Mobile басты бетінде арнайы «Заң және Тәртіп» иконкасы пайда болды. ІІМ баспасөз қызметінің мәліметінше, өтініш беру формасы барынша жеңілдетілген және түсінікті етіп жасалған. Хабарлама жіберілгеннен кейін ақпарат ішкі істер органдарына дереу түседі, ал полиция қызметкерлері жедел әрекет ете бастайды.
Сонымен қатар, осындай иконкалар бірқатар банктік қосымшаларға да енгізілген, бұл сервисті кең аудитория үшін қолжетімді етеді.
Бұл жаңа цифрлық құрал — ІІМ-нің цифрлық трансформациясы аясында және Президент Қасым-Жомарт Тоқаевтың тапсырмалары бойынша жүзеге асырылып жатқан «Заң және тәртіп» бастамасының бір бөлігі.
Жобаның мақсаты — азаматтар мен полиция арасындағы өзара әрекеттесуді жеделдету, әрекет ету жылдамдығын арттыру және көмекке қолжетімділікті жеңілдету.