Қазақстандағы маркетплейстер сауда нысандары мәртебесін алуы мүмкін

Қазақстанда маркетплейстерді сауда нысандарына теңестіруді көздейтін заң жобасы қарастырылуда. Бұл тұтынушылардың құқықтарын қорғауды күшейту мақсатында қолға алынуда. Бұл туралы 2025 жылғы 14 наурызда Сауда және интеграция министрлігіне қарасты Тұтынушылардың құқықтарын қорғау комитеті төрағасының орынбасары Серік Құсайынов «Тұтынушылардың құқықтарын қорғау: бизнес, мемлекет және қоғам диалогы» форумында мәлімдеді.

Оның айтуынша, электрондық сауда саласында тұтынушылардың құқықтарын қорғау механизмдері күшейтілетін болады, себебі онлайн және офлайн сауданы реттеу қағидаттары бірдей болуы тиіс.

«Электрондық сауда кезінде біз сатушыны тікелей көрмейміз және кейбір мәселелерді өзара реттей алмаймыз. Сондықтан маркетплейстерді сауда нысандарына теңестіру ұсынылып отыр, бұл олардың тұтынушылардың бұзылған құқықтарын қалпына келтіру бойынша шаралар қабылдауын талап етуге мүмкіндік береді», – деп түсіндірді Құсайынов.

Қазіргі уақытта заң жобасы Мәжілісте қаралуда. Оның қабылдануы маркетплейстердің тұтынушылардың құқықтарын сақтауға жауапкершілігін арттыруға ықпал етеді.

TSARKA қолдауымен