Қазақстандық сериал Канндағы Netflix-тің Monsters жобасымен бір рейтингке енді

Онлайн-кинотеатр Unico Play ұсынған қазақстандық жастарға арналған “TWO” сериалының трейлері әлемдегі ең беделді кинорыноктардың бірі MIPCOM-да көрсетілді. Қазақстандық жоба әлемдік киноиндустрия көшбасшылары, оның ішінде Netflix, STUDIOCANAL және Beta Film өнімдерімен қатар Fresh TV секциясында таныстырылды. Бұл – қазақстандық кино тарихында осы секцияға таңдалған алғашқы жоба.

MIPCOM – Францияның Канн қаласында өтетін халықаралық көрме және контент рыногы. Fresh TV секциясы әсіресе беделді болып саналады. Оны халықаралық зерттеу компаниясы The Wit ұйымдастырады және бұл секция жаңа таланттар мен кино және медиа саласындағы тың идеяларды іздеуге арналған.

«Жыл сайын әлемнің 1500-ден астам жетекші дистрибьюторлық компаниялары мен продюсерлік студиялары сериалдар мен көпжанрлы контенттің кең ассортиментін ұсынады. Fresh TV секциясына ену кез келген компания үшін өте маңызды, өйткені бұл жобаның басқа елдерге сатылуына жақсы мүмкіндік береді. Біз қазақстандық жобаның осындай жоғары баға алғанына мақтанамыз. Бұл “TWO” жобасының идеясы, оның сюжеттік желісі мен сапасы халықаралық трендтер мен сапа стандарттарына сай екенін білдіреді», - деп атап өтті Unico Play-дің бас продюсері Ирина Соснова.

“TWO” сериалының сюжетінде мектептің жоғары сынып оқушысы Марго жігітін қайтару үшін жүкті екенін өтірік айтады, алайда көп ұзамай оның бұл алдау әрекетінің салдарымен бетпе-бет келуге мәжбүр болады.

«Бұл сериалда біз жасөспірімдер арасындағы жүктілік мәселесін көтердік. Жоба әлеуметтік желілер дәуірінде өмір сүру баланың дамуы мен әлеуметтенуіне қалай әсер ететінін, цифрлық буллингтің не екенін және шынайы өмірдегі адамдар арасындағы қарым-қатынастардың қаншалықты маңызды екенін ойлануға мәжбүр етеді. Біз бала мен ата-ана арасындағы қарым-қатынастың құндылығына ерекше назар аударамыз», - деді Unico Play-дің бас продюсері Бексұлтан Қазыбек.

Айта кетейік, бұл – Uni-Q Group медиахолдингіне кіретін онлайн-кинотеатр Unico Play-дің әлемдегі ең ірі кинорыноктардың біріне алғашқы қатысуы.

TSARKA қолдауымен