Түркістанда IT-парк салу жоспарланып отыр
Түркістанда жаңа IT-парк құру бойынша белсенді жұмыстар жүргізілуде. Түркістан облысының әкімі Нұралхан Күшеров жобаны жүзеге асыруға қызығушылық білдірген әлеуетті инвесторлармен кездесу өткізді. Облыс әкімдігінің баспасөз қызметінің мәліметінше, жоба өңір тарапынан жан-жақты қолдауға ие болады.
IT-парк аумағында мынадай нысандар орналастырылмақ:
● электроника және компьютерлік техника саласындағы өндіріс кәсіпорындары;
● тұрмыстық техника мен электр құрылғыларын құрастыру және жөндеу орталықтары;
● оптикалық кабель шығару зауыты;
● электромобильдер мен зарядтау станцияларын жөндеу бойынша сервис орталықтары;
● жасанды интеллект бағытындағы шешімдерді әзірлеуге арналған жобалар.
IT-парктің құрылуы өңірде жоғары технологиялық салалардың дамуына, инвестиция тартуға және жаңа жұмыс орындарының ашылуына серпін береді деп күтілуде.