Үй тапсырмасы және ChatGPT: Қазақстанда мектептерде ЖИ қолдануға қатысты ережелер енгізілуі мүмкін
Депутаттар ЖИ-дің мектептегі білім беру мен балалардың дамуына әсерін де талқылады. Бұл пікірталасқа оқушылар мен студенттердің ChatGPT секілді нейрожелілерді үй тапсырмасын орындау мен ғылыми жұмыстар жазу кезінде белсенді пайдалануы себеп болды.
Депутат Анас Баққожаев ЖИ-мен жұмыс істеу мәдениетінің жоқтығына алаңдаушылық білдірді:
«Мектепте үй тапсырмасы беріледі, ал бала оны ЖИ көмегімен орындайды. Магистратурада студенттер ғылыми жұмыстарын өздері жазбайды, тек құжатты ChatGPT-ке жүктеп, қысқаша мазмұнын алады. Осындай жағдайда біз білімді, руханиятты, интеллектуалдық дамуды қалай қорғай аламыз? Неліктен мектептерде ЖИ-ді қолдануға нақты талаптар енгізілмейді?».
Депутат Екатерина Смышляева бұл алаңдаушылықты қолдап, ЖИ-ді жиі қолданудың балалардың когнитивтік функцияларына әсері ғылыми тұрғыда дәлелденгенін атап өтті.
Оның айтуынша, Оқу-ағарту министрлігі жасанды интеллектті қолдануға арналған этикалық кодекс әзірлеуді бастаған — бұл құжат оқушыларға да, мұғалімдерге де арналған:
«Бастап айтайын, тыйымдар жұмыс істемейді. Егер министрлік мұның бәріне заңмен тыйым салу қажет деп тапса, онда олар оны таразылап, белгілі бір шектеулер енгізер».