Жаслан Мәдиев Президентке жасанды интеллект жобаларын таныстырды

Президент Қасым-Жомарт Тоқаев Astana Hub-қа барып, онда цифрлық даму, инновациялар және аэроғарыш өнеркәсібі министрі Жаслан Мәдиев негізгі AI-жобаларды таныстырды. Президент экономиканы цифрландыруды жалғастыруды және жасанды интеллект технологияларын енгізуді күшейтуді тапсырды.

«Generative Nation» тұжырымдамасы

Жаслан Мәдиев Сингапурдағы «Smart Nation» және Израильдегі «Startup Nation» сынды әлемдік мысалдардан шабыт алған «Generative Nation» тұжырымдамасының жүзеге асырылуы туралы айтып өтті. Тұжырымдама үш негізгі бағытты қамтиды:

• Институционалдық орта: «Жасанды интеллект туралы» заң әзірлеу.

• Инфрақұрылым: KazLLM суперкомпьютерлік кластерін іске қосу.

• Адам капиталы: білім беру бастамалары арқылы мамандарды даярлау.

“Жасанды интеллектті дамыту жөніндегі кеңес құрып, оған жетекші халықаралық сарапшыларды тартуды тапсырамын. Бұл біздің институционалдық ортаны озық әлемдік стандарттарға сәйкестендіруге мүмкіндік береді. Маған белгілі болғандай, Парламент депутаттары «Жасанды интеллект туралы» заң жобасын ұсынды. Заң шығару жұмысына мұқият қарау қажет. Нейрожелілер үлкен перспективалар ашып қана қоймай, елеулі қауіптер мен қатерлерді де алып келеді. Мысалы, қазіргі уақытта жоғары сапалы жалған ақпаратты тарату және қоғамдық пікірді манипуляциялау үшін фейктер жасалуда. Жасанды интеллектті жауапты пайдалану қағидаттарын, этикалық аспектілерін заң жүзінде бекітіп, оны дамыту мен қолдануда ашықтық пен айқындықты қамтамасыз ету қажет”, – деп атап өтті Президент.

Ұлттық AI платформасы және жобалар

Негізгі жобалар мыналарды қамтиды:

• KazLLM: қазақ, орыс, ағылшын және түрік тілдерінде 148 миллиард токенге оқытылған Қазақстанның алғашқы тілдік моделі. Ол түркі әлеміндегі табиғи тілді өңдеу технологияларын дамытуға бағытталған халықаралық TurkLLM моделі үшін негіз болады.

• eGov жүйесіндегі AI-агенттер: азаматтар мен мемлекеттік қызметшілерге арналған жеке көмекшілер. Олар рутиналық процестерді автоматтандырады. AI-агенттер азаматтарға қайда жүгіну керектігін іздеуге немесе кезек күтуге уақыт жұмсамауға мүмкіндік береді.

• Жасанды интеллекттің ұлттық платформасы: AI-шешімдерді жылдам әзірлеуге арналған қорғалған орта.

Кадрлар мен стартаптарды дамыту

“Жасанды интеллект технологиялары саласындағы отандық және халықаралық білім беру бағдарламалары еліміздің кадрлық әлеуетін нығайтуға үлес қоса алады. Үкіметке AI-Sana бағдарламасын кезең-кезеңімен жүзеге асыру мәселесін қарауды тапсырамын. Бұл бағдарлама оқыту, зерттеу және стартаптарды әзірлеуді біріктіретін динамикалық экожүйе қалыптастыруға ықпал етуі тиіс. Әлемдегі жетекші университеттердің акселерация тәжірибесін пайдалану қажет. Қазақстанның әрбір тұрғынына жасанды интеллекттің пайдасын жеткізіп, оның не үшін қажет екенін және оны қалай дұрыс пайдалану керектігін түсіндіру маңызды”, – деді Президент.

• AI-қозғалысы: 5 жылда 1 миллион адамды оқытуға бағытталған. Бағдарламалар мектеп оқушыларын, мемлекеттік қызметшілерді және корпоративтік секторды қамтиды.

• Astana Hub акселерациялық бағдарламаларды жүзеге асырады, мысалы, AI’preneurs, Google-дың Silk Way акселераторы және Draper University-ден Hero Training.

• Alem.ai халықаралық жасанды интеллект орталығы құрылады, ол өңірдегі AI дамуының платформасына айналады.

“AlemAI халықаралық орталығы AI-қозғалысының эпицентрі және Қазақстанның цифрлық трансформациясының символы болуы керек. Бұл платформа еліміздің үздік ақыл-ойын біріктіріп, әлемнің түкпір-түкпірінен таланттарды тартады. Мұнда зерттеу және тәжірибелік-конструкторлық зертханалар, бағдарламалау мектебі және халықаралық технологиялық компаниялардың кеңселері орналасады. Astana Hub пен AlemAI шынайы инновациялар фабрикасына айналып, халықаралық серіктестерді тартып, ғылыми зерттеулерді ынталандырып, экономиканың, білім берудің және әлеуметтік саланың барлық негізгі салаларына арналған шешімдер жасайды”, – деді Мемлекет басшысы.

Стартап мысалдары

• Cybernetai: клиенттермен өзара әрекеттесу үшін дауыстық роботтарды әзірлеу және енгізу саласына маманданған.

• ArlanBiotech: иммундық терапия мен диагностика саласындағы күрделі мәселелерді шешуге үлес қосуға ниетті.

• Higgsfield AI: ғалымдар мен инженерлерге күрделі компьютерлік модельдерді оқытуға көмектесетін жетілдірілген жүйені әзірледі.

Экономиканы қолдау

AI-бастамалар экономиканың негізгі салаларын трансформациялауға және Қазақстанның бәсекеге қабілеттілігін арттыруға бағытталған. Alem.ai Қазақстанның технологиялық трансформациясының символына айналып, елдің жаһандық AI-картадағы орнын нығайтады.

Презентация Қазақстанның инновацияларды белсенді түрде енгізіп, болашақта интеллектуалды, технологиялық дамыған қоғамның негізін қалыптастырып жатқанын көрсетті.

TSARKA қолдауымен