АйтарлықIT

Алматыда мүмкіндігі шектеулі адамдарға кітапханалардан кітаптарды тегін жеткізу қызметі сынақтан өтуде

Ақпарат ағыны

• 1 min read
Алматыда мүмкіндігі шектеулі адамдарға кітапханалардан кітаптарды тегін жеткізу қызметі сынақтан өтуде

Алматы қаласының кітапханалары Алматы қаласы әкімдігінің және Yandex Qazaqstan компаниясының қолдауымен мүмкіндігі шектеулі азаматтарға арналған кітаптарды жеткізу қызметін тестілеуден өткізуде. Пилоттық жоба аясында кітаптар қаладағы 28 кітапханадан жеткізіледі және алушылар үшін бұл қызмет тегін.

Кітаптарды алу үшін Алматы кітапханаларының сайтынан қажетті кітаптарды таңдап, өтініш толтыру қажет. Сонымен қатар, өтінішке адамның қозғалу мүмкіндігінің шектеулі екенін растайтын құжатты қоса беру керек. Шамамен 1-2 күн ішінде тапсырыс кітапхана тарапынан өңделеді және дайындалады. Дайын болған күні кітаптар өтініште көрсетілген мекенжайға Яндекс Go серіктестері арқылы жеткізіледі. Пилоттық жоба 2025 жылдың мамыр айының соңына дейін жалғасады.

«Бұл – қаланың кітап қорына қолжетімділікті қамтамасыз ететін және мүмкіндігі шектеулі азаматтардың Алматы кітапханаларының қызметтерін пайдалануына кедергі келтіретін тосқауылдарды жоятын тағы бір жоба. Жоба әкімдіктің қолдауымен жүзеге асуда. Қазіргі кезеңде біз қызметті тек мүмкіндігі шектеулі азаматтарға ұсынып отырмыз және ол толығымен тегін. Жаз мезгіліне қарай барлық қала тұрғындарына да қызмет көрсету мүмкіндігін қарастырып жатырмыз, бірақ бұл жағдайда жеткізу ақысын тапсырыс берушілер өздері төлейтін болады», – деп атап өтті Алматы кітапханаларының директоры Мейрам Бектембаев.
«Біз цифрлық қызметті дамытамыз, бірақ басты назарымыз – адамдар мен олардың қажеттіліктерінде. Егер сервис арқылы біз кітаптарды қолжетімді етіп, адамдардың өмірін жеңілдете алсақ, демек, біз маңызды мақсатымыздың бірін орындап жатырмыз – технологияның көмегімен адамдардың мәселелерін шешудеміз», – деді Яндекс Go Доставка сервисінің жетекшісі Ержан Базарбай.

Яндекс Доставка, Яндекс Go-дағы жеткізу – ақпараттық сервис болып табылады. Курьерлік жеткізу және/немесе басқа да көлік қызметтерін сервистің серіктестері жүзеге асырады.

TSARKA қолдауымен