Америкалық GE HealthCare Қазақстанда заманауи томографтар шығаруды жоспарлауда
Премьер-министр Олжас Бектенов Қазақстандық инвестициялық дөңгелек үстел аясында GE HealthCare-дің аймақтық президенті Костас Делигианниспен кездесу өткізді. Тараптар GE HealthCare диагностикалық медициналық жабдықтарын Қазақстанда өндіру туралы келісімді іске асыру мәселелерін талқылады, деп хабарлайды ҚазАқпарат ҚР Үкіметінің баспасөз қызметіне сілтеме жасап.
GE HealthCare, General Electric-тің бөлімшесі, медициналық жабдықтар, фармацевтика және деректерді талдауға арналған цифрлық шешімдер саласындағы әлемдік көшбасшы болып табылады.
Кездесуде озық диагностикалық құрылғылар өндірісін жергіліктендіру және Қазақстанда өндірістік алаң мен Ұлттық клиникалық бейнелер мұрағатын құру жоспарлары талқыланды. Бірінші кезеңде ультрадыбыстық аппараттар мен заманауи компьютерлік томографтар шығару жоспарлануда, кейіннен ассортиментті кеңейту көзделіп отыр. Медициналық бейнелердің орталықтандырылған мұрағаты Денсаулық сақтаудың бірыңғай цифрлық кеңістігінде медициналық деректердің қауіпсіз сақталуын және алмасуын қамтамасыз етеді.
Премьер-министр Бектенов денсаулық сақтау жүйесін жаңғырту және цифрлық технологияларды енгізу Үкімет үшін басымдық екенін атап өтті. Ауруханаларды жабдықтау және білікті мамандарды даярлауға ерекше назар аударылады.
Костас Делигианнис GE HealthCare-дің Қазақстан нарығындағы қатысуын кеңейту жоспары туралы айтып берді. Қазіргі уақытта еліміздің медициналық мекемелерінде компанияның 3 мыңнан астам жабдықтары қолданылуда. Мемлекеттік онкологиялық бағдарлама аясында 100-ден астам маммограф орнатылып, 6 мың қазақстандық маман GE HealthCare алаңдарында оқудан өтті.
Кездесу қорытындысы бойынша тараптар Қазақстанның денсаулық сақтау жүйесін жетілдіру үшін әрі қарай ынтымақтастыққа дайын екенін растады.