Астанада алғашқы автономды суперкомпьютер таныстырылды
EXPO көрме кешенінде NeuroBox компаниясы жасаған Қазақстандағы алғашқы автономды суперкомпьютер таныстырылды. Жүйе жасанды интеллектпен интернетке қосылусыз жұмыс істейді, бұл деректердің сыртқа таралу қаупін болдырмайды.
Әзірлеушілердің айтуынша, бұл қадам елдің цифрлық тәуелсіздігіне жол ашады. Суперкомпьютердің негізгі элементі – әртүрлі нейрожелілерді бірыңғай кеңістікке біріктіретін мультиагенттік платформа. Ол цифрлық агенттерден құралған командаларды құруға мүмкіндік береді: біреулері деректерді талдайды, екіншілері мәтін жазады, үшіншілері процестерді жоспарлайды.
Жүйе жабық контурда жұмыс істейді: барлық деректер іште сақталады, бұл мемлекеттік органдар мен ақпаратты қорғауға жоғары талап қоятын компаниялар үшін аса маңызды.
Әзірлеушілер жобаның мақсаты адамды алмастыру емес, оның жұмысын тиімдірек ету екенін атап өтті. Мысал ретінде олар Индустрия министрлігіне арналған жобаны келтірді: суперкомпьютер кәсіби стандарттарды небәрі 4,5 минутта қалыптастырды, ал бұған дейін ол үшін екі апта қажет болатын.
Презентацияда жүйені қолданудың практикалық кейстері көрсетілді: жобалық құжаттаманы нормативтерге сәйкестігін тексеру, мемлекеттік сатып алуларға арналған спецификацияларды талдау және медицинадағы клиникалық протоколдарды салыстыру.