ChatGPT, Temu және Roblox: Қазақстандағы мобильді қосымшалар нарығы қалай өзгерді
2025 жылдың екінші тоқсанында ChatGPT пен Temu App Store көшін бастаса, Google Play-де Roblox алға шықты, ал Block Blast пен Sajda секілді әдеттегі танымал қосымшалар позициясын жоғалта бастады. Тұрақтылығын сақтаған жалғыз санат — Maps & Navigation: пайдаланушылар әлі де 2GIS-ке сенім артады. Netpeak Kazakhstan сарапшылары Қазақстандағы мобильді қосымшаларды жүктеу бойынша зерттеу нәтижелерін жариялап, ең танымал санаттарды анықтады: білім беру, қаржы, Food & Delivery, навигациялық сервистер және lifestyle.
2025 жылдың сәуір, мамыр және маусым айларында Қазақстандағы мобильді қосымшалар нарығында Android айқын жетекшілігін сақтап қалды — барлық жүктеулердің 70%-дан астамы осы жүйеге тиесілі. ChatGPT App Store-дегі позициясын нығайтты: жүктеулер саны I тоқсанмен салыстырғанда 8%-ға өсті. Temu бұдан да әсерлі нәтиже көрсетті — өсім 18%, бұл оны рейтингтің екінші сатысына көтерді. Threads аздап төмендеді (шамамен –2%), бірақ әлі де үздік үштікте тұр.
Android-нарығында Roblox жаңа лидер атанды — жыл басымен салыстырғанда жүктеулер +26%-ға өсті. Бұл Block Blast-ты ығыстырды, оның көрсеткіштері 50%-дан астамға төмендеді. 2GIS сенімді түрде екінші орында (+2%), ал Kaspi.kz бірден +30% өсім көрсетіп, үшінші орынға көтерілді. Telegram да +6% қосып, үздік төрттікке кірді. Жаңа қосымшалар қатарында Geometry Dash Lite пен Delta Force бар — екеуі де алғаш рет үздік ондыққа енді. Мемлекеттік қызметтер саласынан eGov mobile тұрақтылық танытып, өткен тоқсан деңгейінде қалды.
Қаржылық қосымшалар: Freedom мен Kaspi алдыңғы қатарда
2025 жылдың екінші тоқсанында App Store-да сөзсіз фаворит болып Freedom SuperApp қалды. Сәуір–маусым аралығында қосымша 288 мың жүктеу жинады, бұл өзгермеген көрсеткіш. Otbasy Bank позициясын нығайтты — жүктеулер саны 179 мыңнан асып, қаңтар–наурызбен (168 мың) салыстырғанда 6%-ға артты. Үшінші орында — Halyk Kazakhstan, оның қосымшасы аудиториясын кеңейтіп келеді: 115 мың жүктеу, өсім шамамен 20%.
Төртінші және бесінші орындарды Home.kz (Home Credit Bank) пен ForteApp бөлісті. Айта кетерлігі, ForteApp жыл басында топ-4 қатарында болса да, қазір бәсекелесіне жол берді, бірақ айырмашылық аз.
Android экожүйесінде I тоқсанда Freedom SuperApp пен Kaspi.kz арасында теңдік байқалған еді (айырмашылық 0,3%-дан аз), алайда II тоқсанда жағдай күрт өзгерді. Kaspi.kz айқын серпіліс жасап, 1,58 млн-нан астам жүктеумен көш бастады — бұл жыл басымен салыстырғанда +30%.
Freedom SuperApp керісінше төмендеді: I тоқсандағы 1,2 млн-нан II тоқсанда 966 мыңға дейін. Halyk Kazakhstan өсімін жалғастырды: 630 мыңнан 825 мыңға (+30%). Ал Otbasy Bank пен Home.kz аудиториясын айтарлықтай жоғалтты. Otbasy жүктеулері екі есеге жуық азайды — 281 мың (488 мыңнан), Home.kz болса 336 мыңнан 258 мыңға түсті.
Білім беру қосымшалары: ғаламдық лидерлердің тұрақтылығы
2025 жылдың II тоқсанында Қазақстандағы білім беру қосымшаларының сегменті тұрақты өсім көрсетті — ғаламдық шешімдер де, жергілікті қосымшалар да. iOS-та әдеттегідей Duolingo - алдыңғы қатарда, тоқсан ішінде шамамен 86 мың жүктеу (+1% өткен кезеңге қарағанда).
Екінші орында — балалар ойыны Toca Boca World (+2%). Жергілікті PDDTest.KZ күрт өсім көрсетті — 48,5 мыңнан 60 мың жүктеуге дейін (+24%). Бұл нәтиже оны санаттың үздік үштігіне шығарды. Photomath позициясын сақтады, бірақ өсім баяу болды. Топқа Speak & Learn English: Learna қосымшасы кірді — шамамен 34 мың жүктеу, бұл тілдік сервистер арасындағы бәсекенің жандануын көрсетеді.
Google Play-де Duolingo тағы да жетекші орынды иеленді — шамамен 320 мың жүктеу (+3%). Екінші орынға Qalan көтерілді (123,5 мың жүктеу), I тоқсанда ол үшінші орында болған. Bilim Class керісінше төмендеді: 180 мыңнан 121,5 мың жүктеуге дейін (–32%). Дегенмен, ол әлі де үздік үштікте.
Buddy.ai позициясын нығайтты (+6%) — «ойын арқылы оқыту» форматы балалар мен ата-аналар арасында сұранысқа ие. Үздік бестікке Minecraft Education кірді — шамамен 94 мың жүктеу (+25%).
Азық-түлік жеткізу: Dodo Pizza vs Wolt Delivery
iOS-та Dodo Pizza бірінші орынға шықты — 144 441 жүктеу, ол Wolt Delivery-ді басып озды (124 721). Үшінші орында — Glovo, 72 мыңнан астам жүктеумен. Яндекс Еда (64 738) мен ZEBRA COFFEE (50 933) төртінші-бесінші орындарда. Айта кетейік, I тоқсанда да Dodo көш бастаған, Wolt екінші, үшінші орында Airba Fresh болған. ZEBRA COFFEE алғаш рет жыл басынан бері топқа енді.
Android-та Dodo Pizza мен Wolt Delivery дерлік тең түсті — 173 322 және 172 842 жүктеу. Үшінші орында — жаңа «Вплюсе» (115 716). Одан кейін Яндекс Еда (107 009), бесінші орында — Chocofood (24 272), ол алдыңғы қатардағылардан айтарлықтай артта қалды. I тоқсанда Android-та Wolt көш бастаған еді, кейінгі орындарда Dodo мен Яндекс Еда, төрттікті KFC жапты.
Lifestyle-қосымшалар: Pinterest тұрақты
iPhone пайдаланушылары арасында Pinterest лидер болып қалды — 167 мыңнан астам жүктеу, бұл өткен тоқсаннан +8%. Екінші орында — Beeline-ның Janymda сервисі (136 мың), ол айтарлықтай өсім көрсетіп, activ-тен (116 мың) озып кетті.
«Дом с Алисой» керісінше төмендеді: жыл басында 88 мыңнан астам жүктеу болса, қазір тек 59 мың. Өткен тоқсанда үздік бестікке енген діни қосымша Sajda да екі еседен астам аудиториясын жоғалтты — 145 мыңнан 49 мыңға дейін.
Android-та да Pinterest жетекші орынды иеленді, 365 мың жүктеу (+6%). Негізгі серпіліс — самокат жалдау сервисі JET, ол бірден екінші орынға көтерілді (220 мың жүктеу). Кейін HalaMe (161 мың) мен Sajda (158 мың). Sajda I тоқсанмен салыстырғанда бірден –35% төмендеді. Жыл басында Google Play-де «әзіл-қалжың» қоңыраулар (Prank Call, Prank Video Call) танымал болса, II тоқсанда олар толығымен рейтингтен шығып қалды.
Навигация: 2GIS жетекшілігін сақтап тұр
2025 жылдың II тоқсанында Қазақстандағы Maps & Navigation санаты құрылымын өзгертпеді: iOS пен Android-та да алдыңғы қатардағылар қатарында 2GIS, Google Maps, Yandex Maps және inDrive бар. Айырмашылық тек жүктеу санында.
iOS-та пайдаланушылар әдеттегідей 2GIS-ті таңдайды — қосымша 401 мыңнан астам рет орнатылды (+3%). Екінші орында — Google Maps (99 мың), бұл I тоқсанға дерлік тең. Үшінші орында — Яндекс, 70 мың жүктеу (+8%). Нәтижесінде iOS нарығы тұрақтылықты көрсетті.
Android-та көлем әлдеқайда үлкен. Мұнда 2GIS 1,71 млн-нан астам жүктеумен жетекшілігін нығайтты (+1%). Яндекс екінші орында — 725 мың жүктеу. Ал inDrive қарқынын жоғалтты — бар болғаны 559 мың жүктеу, бұл жыл басымен салыстырғанда –16%.
