Дарынды оқушылар SMART DARYN арқылы білім беру ресурстарына қол жеткізе алады
Қазақстанда дарынды оқушыларды қолдауға және дамытуға бағытталған SMART DARYN ұлттық цифрлық платформасы әзірленуде. Бұл туралы “Дарын” республикалық ғылыми-тәжірибелік орталығының директоры Ғаждембек Тұрсынов Орталық коммуникациялар қызметінде өткен баспасөз конференциясында мәлімдеді.
Оның айтуынша, талантты оқушылармен жұмыс істеуді цифрландыру мектептер, педагогтер мен оқушылар арасындағы өзара әрекеттестікті жақсартып, білім беру ресурстарына қолжетімділікті қамтамасыз етеді және білім сапасын арттыруға ықпал етеді. Платформа ерекше қабілеттерін танытқан балалармен жұмыс істейтін жоғары білікті мамандарды біріктіретін құрал болады.
Жоба аясында мамандандырылған қауымдастықтар да құрылады. Олар халықаралық олимпиадаларда жоғары нәтиже көрсеткен қазақстандық мектептердің табысты тәжірибесін таратуға бағытталады.
Ғаждембек Тұрсынов 2025 жылдың басында Қазақстанда Халықаралық Жәутіков олимпиадасы өткенін еске салды. Оған 15 елден 700-ден астам оқушы қатысты. Бұл зияткерлік жарыс Қазақстанның әлемдік білім беру қауымдастығындағы позициясын нығайтуға маңызды қадам болды және отандық оқушылардың жоғары дайындығын тағы бір рет дәлелдеді.