АйтарлықIT

Decentrathon 3.0: 16 млн теңге жүлде қоры бар ұлттық онлайн-хакатон басталады

Ақпарат ағыны

• 2 min read
Decentrathon 3.0: 16 млн теңге жүлде қоры бар ұлттық онлайн-хакатон басталады

23–25 мамыр аралығында Қазақстандағы ең ірі ұлттық хакатондардың бірі – Decentrathon 3.0 өтеді. Биыл алғаш рет бұл іс-шара толықтай онлайн форматта ұйымдастырылады. Осылайша, тұрғылықты жері, жасы немесе тәжірибесіне қарамастан, кез келген адам бақ сынай алады.

Тіркеу 22 мамырға дейін мына сілтеме арқылы жүргізіледі.

Хакатон бағдарламасы екі бағыттан тұрады – AI-трек және GameJam. Жасанды интеллект саласына қызығатын, бірақ техникалық тәжірибесі жоқ қатысушылар үшін арнайы «Креативтегі AI» трегі іске қосылды. Бұл бағытта бағдарламалау дағдылары қажет емеc, креативті ойлау, жаңаны үйренуге және заманауи AI құралдарымен жұмыс істеуге дайын болу жеткілікті. Трек Kazakhtelecom, activ 5G және Mastercard қолдауымен жүзеге асырылады.

GameJam бағыты аясында қатысушылар өз ойындарының прототиптерін әзірлеп, тарту механикаларымен жұмыс істеп, ойын индустриясындағы нақты кейстермен таныса алады. Бұл бағыт Қазақстандағы мобильді ойындар индустриясының көшбасшысы – Grand Mobile компаниясымен серіктестікте өткізіледі.

Хакатонды Astana Hub пен Blockchain and AI Technology Center бірлесіп, ҚР Цифрлық даму, инновациялар және аэроғарыш өнеркәсібі министрлігінің қолдауымен ұйымдастырып жатыр. 

«Astana Hub цифрлық экожүйені дамытып, жастарды технология саласына тартуға бағытталған бастамаларға тұрақты түрде қолдау көрсетеді. Decentrathon 3.0 – түрлі дайындық деңгейіндегі қатысушыларға бастау алаңы бола алатын хакатон. Біз әр таланттың әлеуетін ашуға жағдай жасау маңызды деп санаймыз. Бұл ретте, онлайн формат хакатонды барынша қолжетімді етеді, яғни еліміздің кез келген жерінен қатысуға болады. Бұл жобаның ауқымын кеңейтіп, көп адамды тартуға жол ашады»,– деді Дания Ахметова, Astana Hub басқарушы директоры.

Decentrathon 3.0 қатысушыларына кешенді қолдау ұсынылады. Атап айтқанда, сала сарапшыларынан кәсіби менторлық сүйемелдеу, серіктес компаниялардан арнайы тапсырмалар мен бағалы сыйлықтар ұсынылады. Жүлде қорынан бөлек, барлық қатысушыға сертификаттар мен ресми мерч-наборлар табысталады. Хакатон тек шешім әзірлеуді ғана емес, сонымен қатар IT-қауымдастығын дамытуды көздейді. 

«Decentrathon – ең алдымен адамдар туралы. Бұл – ауқымды істің бөлігі болғысы келетін, бірлесіп дамуға және жаңалық ашуға ұмтылатын жандар жайлы. Жай ғана хакатон емес, әркім өз идеясын ортаға салып, бір толқында жұмыс істей алатын орта. Біз қозғалысқа, ашықтыққа және технологияның баршаға қолжетімді болуына басымдық береміз», – деді Айдана Қасқырбек, Blockchain and AI Technology Center жетекшісі.

Хакатонның техникалық инфрақұрылымы Decentra платформасы арқылы қамтамасыз етіледі. Бұл – Telegram экожүйесіндегі мини-қосымша, оны былтырғы маусым қатысушылары әзірледі. Платформаға тіркелу және тапсырмаларды орындау үшін қосымша бағдарламаларды жүктеудің қажеті жоқ, барлығы ыңғайлы әрі жедел түрде іске асырылады. Ең бастысы – қатысу тегін.

Толық ақпарат пен тіркеу Decentrathon Telegram-арнасында қолжетімді. 

TSARKA қолдауымен