АйтарлықIT

Digital Nomad визасы мен тұруға рұқсат: Қазақстан цифрлық көшпенділер үшін үздік 10 елдің қатарына кіргісі келеді

Ақпарат ағыны

• 2 min read
Digital Nomad визасы мен тұруға рұқсат: Қазақстан цифрлық көшпенділер үшін үздік 10 елдің қатарына кіргісі келеді

Қазақстанға халықаралық IT-мамандарды тарту мәселесі AlmatyFair.ai көрмесі аясында өткен «Шекарасыз болашақ: цифрлық көшпенділер дәуірі» атты панельдік сессияның негізгі тақырыбына айналды. Сарапшылар цифрлық көшпенділер үшін қолайлы бизнес-ортаны қалыптастыру, көші-қонның құқықтық аспектілері және IT-мамандарды тартуға арналған жаңа құралдарды іске қосу мәселелерін талқылады.

Цифрлық көшпенділер үшін ең тартымды он елдің қатарына кіру мақсатында Қазақстан ұмтылып отырған халықаралық рейтингтерді зерттеуге ерекше назар аударылды. Бұл мақсатқа стратегиялық бастамалардың іске асуы арқылы қол жеткізуге болады. Мысалы, Digital Nomad Visa — 12 айға берілетін электрондық виза, ол көп мәртелі визаны алу және ықтиярхатқа өтініш беру мүмкіндігін қарастырады. Сондай-ақ, Digital Nomad Residency — шетелдік IT-мамандарға ықтиярхатты жеңілдетілген түрде алуға мүмкіндік беретін онлайн құрал.

«Біз халықаралық IT-таланттар үшін Қазақстанды жұмыс істеуге әрі өмір сүруге қолайлы ел етуге ұмтыламыз. Жаңа бастамалардың іске қосылуымен шетелдік мамандар қазақстандық және шетелдік компаниялармен еркін жұмыс істей алады, сондай-ақ жергілікті IT-экожүйеге интеграциялануға мүмкіндік алады. Біз әрбір цифрлық көшпендіге Қазақстанға көшу үдерісінің барлық кезеңінде – өтінім беруден бастап экожүйеге бейімделуге дейін – жан-жақты қолдау көрсетеміз. Біздің мақсатымыз – жай ғана IT-мамандарды тарту емес, сонымен қатар олардың елдегі кәсіби және іскерлік өсуіне жағдай жасау», – деді Astana Hub қатысушыларды қолдау офисінің директоры Талғат Маратов.

Digital Nomad Residency пилоттық жобасы аясында АҚШ, Канада, Грекия және ТМД елдерінен келген үміткерлерді қоса алғанда, бірнеше ондаған өтінім қабылданды. Қазақстан IT-мамандар үшін бірқатар тиімді мүмкіндіктер ұсынады: табыс деңгейін растау талаптарының болмауы, өтінімді онлайн түрде ыңғайлы тапсыру мүмкіндігі және елде ұзақ мерзімді тұруға жағдай жасалған.

«Менің компаниям – жүз пайыз экспортқа бағытталған, және біз Батыс елдерінен бастап Азия мен Таяу Шығысқа дейінгі инвесторлармен жұмыс істейміз. Көшуге ел таңдағанда Қазақстан өте қолайлы жер болып көрінді, себебі мұнда жұмыс істеу мен өмір сүруге барлық жағдай жасалған. Елде жұмыс істеген уақыт ішінде жүйенің тиімді жұмыс істейтініне көз жеткіздім – құжаттарды рәсімдеу қиындық тудырмайды. Көптеген адамдар бизнесін орналастыру үшін ел таңдағанда, Қазақстанда білікті кадр табу қиын болады деп алаңдаса да, мен мұнда төрт жыл ішінде ондай проблеманы байқаған жоқпын. Бұл маған бизнесімді сенімді түрде дамытуға және дарынды мамандарды тартуға мүмкіндік береді. Қазақстан – цифрлық көшпенділер үшін ұзақ мерзімді кәсіби өсу мен даму мүмкіндігін ұсынатын жетекші елдердің біріне айналу үшін барлық әлеуетке ие», – деп өз тәжірибесімен бөлісті Suretter Software IT-компаниясының негізін қалаушы және CEO-сы Алексей Кодубец.

Панельдік сессияның басқа да спикерлері шетелдік азаматтардың Қазақстанда болуын реттейтін заңнамалық нормалар туралы түсініктеме берді. Мәселен, Алматы қаласы ПД Көші-қон қызметі басқармасының аға инспекторы, полиция капитаны Ердәулет Үсенов шетелдіктердің елде тұру тәртібі мен көші-қон заңнамасының негізгі талаптары туралы айтты. Ал WPK компаниясының өкілдері Айсана Акимбаева мен Әлия Үдербаева бірқатар елдер үшін визасыз режим шарттары, ЖСН алу тәртібі, дактилоскопия және өзге де қажетті рәсімдер жайлы ақпаратпен бөлісті.

Еске сала кетейік, 28–30 наурыз күндері Алматыда жасанды интеллект саласындағы AlmatyFair.ai көрмесі өтті. Іс-шара жетекші IT-компанияларды, стартаптарды және AI саласының сарапшыларын бір алаңға жинады. Көрмені ҚР Цифрлық даму, инновациялар және аэроғарыш өнеркәсібі министрлігі мен Алматы қаласының әкімдігі ұйымдастырды. Көрменің бас демеушісі — Kaspi.kz, ал ресми серіктестері — Freedom Bank пен Halyk Bank болды.

Digital Nomad Visa және Digital Nomad Residency бағдарламалары туралы толығырақ ақпаратты, сондай-ақ қатысу шарттарын Astana Hub платформасынан білуге болады.

TSARKA қолдауымен