Яндекс Карт API Қазақстандағы курьерлерге ғимарат ішінде бағыт табуға көмектеседі
Яндекс Карт API Қазақстанда өз өнімдерін жаңартып, жаңа мүмкіндіктерді ұсынды. Жаңартулардың ішінде ғимарат ішіндегі навигация, курьерлер үшін баспалдақтар мен пандустарды ескеретін икемді маршрут құру, сондай-ақ автомобиль қозғалысына арналған белгілі бір жол түрлерін маршруттан шығару мүмкіндігі бар. Бұл жетілдірулер соңғы миль жеткізілімін пайдаланатын немесе жүк тасымалдаумен айналысатын компаниялардың жұмысын айтарлықтай жеңілдетеді, қызметкерлердің қозғалысын жаяу да, көлікпен де тиімдірек жоспарлауға көмектеседі.
Жаңартылған MapKit SDK арқылы мобильді қосымшаларға карталарды интеграциялау кезінде Қазақстанның негізгі қалаларындағы ірі сауда-ойын-сауық орталықтары мен әуежайлардың егжей-тегжейлі қабаттық жоспарлары қолжетімді болды. Қазіргі уақытта Алматы, Астана, Қарағанды және басқа да ірі қалаларда 150-ден астам нысанның жоспары бар, бұл курьерлік қызметтердің жұмысын едәуір жеңілдетіп, жеткізу жылдамдығын арттыруға мүмкіндік береді. Сонымен қатар, бизнес нысандарды – банкоматтар, вендинг машиналары, зарядтау станциялары және басқа да объектілерді карталарда нақтырақ көрсете алады.
MapKit SDK енді маршруттарды құру кезінде баспалдақтарды, пандустарды, эскалаторларды және тік өрлерді ескереді. Бұл компанияларға өздерінің жаяу жүргінші курьерлері үшін ыңғайлы жолдарды таңдауға және күрделі учаскелерден аулақ болуға көмектеседі. Сонымен қатар, маршруттарды жергілікті ауа райы жағдайларына бейімдеуге болады. Енді бизнес белгілі бір маусымдағы және ауа райындағы маршруттың ыңғайлылығын бағалап, оны тиісті түрде реттей алады – мысалы, тайғақ кезеңде самокатпен жүретін курьерлер үшін тік өрлерді азайтуға болады.
Жүк көлігінің жүргізушілері мен автокурьерлер теміржол өткелдерін, тоннельдерді, паром өткелдерін және өткел бермейтін өзендерді маршруттан алып тастай алады. Сонымен қатар, ақылы жолдардан, асфальтталмаған немесе нашар жолдардан айналып өту мүмкіндігі де сақталған. Бұл параметрлер Қазақстандағы логистикалық компанияларға өз тауарларын тасымалдау немесе бизнес міндеттеріне сәйкес қажетті маршруттарды автоматты түрде құруға көмектеседі.
Сонымен қатар, өздерінің маршруттау жүйесін пайдаланатын компаниялар үшін басқа сервистерден алдын ала жасалған маршруттарды жүктеу және оларды өзгеріссіз қолдану мүмкіндігі қосылды.