Яндекс қазақстандықтарды Yandex Cup бағдарламалау бойынша халықаралық чемпионатқа қатысуға шақырады
Яндекс бағдарламалау бойынша жетінші халықаралық Yandex Cup 2024 чемпионатына тіркелудің басталғанын хабарлады. Биылғы жарыс үш санатқа бөлінген: бастаушы және тәжірибелі ересек бағдарламашылар, 14-18 жас аралығындағы жасөспірімдер және Яндекс қызметкерлері үшін жеке жарыс. Турнирдің жүлде қоры 65 миллион теңгеге дейін ұлғайды.
Yandex Cup 2024 қатысушыларына аналитика, фронтенд және бэкенд-әзірлеу, мобильді әзірлеу, машиналық оқыту және спорттық бағдарламалауға арналған «Алгоритм» бағыттары ұсынылады. Жасөспірімдер екі бағытта, яғни аналитика және «Алгоритм» бойынша жарыса алады. Қатысушылар бірнеше бағытта бағын сынап, жартылай финалға дейін өздеріне тиімдісін таңдай алады.
Чемпионат үш кезеңнен тұрады: 14-20 қазан аралығында онлайн-іріктеу, 2 қарашада онлайн-жартылай финал, ал финал және марапаттау рәсімі 2-6 желтоқсан аралығында өтеді. Yandex Cup 2024 ерекшелігі – Gold-финал, онда жасөспірімдер мен Яндекс қызметкерлерін қоса алғанда, әр бағыттың жеңімпаздары абсолютті чемпион атағына таласады.
Чемпионатқа өтінімдер 20 қазанға дейін қабылданады. Жеңімпаздар ақшалай сыйлықтарға ие болады, ал үздік қатысушылар Яндекс компаниясында жеңілдетілген сұхбаттасу мүмкіндігіне ие болады.
Яндекс 2011 жылдан бері бағдарламалау бойынша жарыстар ұйымдастырып келеді. Өткен жылы Yandex Cup финалы Алматыда өтті, оған 16 елден 120 қатысушы келді. Қазақстандық Батыр Сардарбеков «Алгоритм» санатында финалист атанды.