KASE Tabadul Hub-қа қосылды: Қазақстандық инвесторлар БАӘ-нің бағалы қағаздарына қол жеткізеді
Қазақстан қор биржасы (KASE) ресми түрде Абу-Даби биржасы (ADX) құрған Tabadul Hub электронды сауда платформасының қатысушысы атанды. Келісімге қол қою рәсімі 14 ақпанда Алматыда өтті.
Бұл не береді?
Енді қазақстандық инвесторлар KASE арқылы БАӘ-нің ең ірі компанияларының акцияларымен сауда жасай алады. Қазақстан мен БАӘ брокерлік компаниялары KASE және ADX биржаларында бағалы қағаздарға кросс-биржалық қолжетімділік алады. Бұл биржалар арасындағы халықаралық ынтымақтастық пен өзара сауда мүмкіндіктерін кеңейтеді.
Tabadul – ірі қор биржаларын біріктіретін цифрлық хаб, ол кросс-биржалық сауданы дамытуға арналған. 2024 жылдың сәуірінде бұл платформаға Astana International Exchange (AIX) биржасы да қосылған болатын.
KASE-нің Tabadul жүйесіне қосылуы ADX-пен стратегиялық серіктестікті нығайтып, қазақстандық инвесторлар үшін жаңа мүмкіндіктер ашып, елдің қаржы нарығын шетелдік инвесторлар үшін тартымды ете түседі.