Қазақстан қыздар арасындағы халықаралық бағдарламалау олимпиадасында екі қола медаль жеңіп алды
Kaspi.kz қолдауымен Қазақстан құрамасы қыздар арасындағы Еуропалық информатика олимпиадасына (European Girls Olympiad in Informatics – EGOI) қатысты. Мектеп оқушыларына арналған алгоритмдік бағдарламалау бойынша әлемдегі ең ірі олимпиада биыл 2025 жылғы 14–20 шілде аралығында Германияның Бонн қаласында өтті.
Биылғы олимпиадаға Еуропа, Азия және басқа да аймақтардан 60 елден 226 қатысушы қатысты. Қазақстан атынан ұлттық іріктеу нәтижесінде жасақталған құрам жарысқа қатысты:
- Турғанбаева Тамила, 11-сынып, НЗМ ФМН, Астана
- Игзекова Алина, 9-сынып, ФМЛ, Қостанай
- Баймұхамбетова Аружан, 7-сынып, Flagman мектебі, Астана
- Исаева Анита, 9-сынып, РФМШ, Алматы
Құрама жетекшілері – Адина Мағауина және Темірлан Сатылханов.
Қазақстан командасы EGOI олимпиадасына Астанадан қашықтан форматта қатысты. Бұл форматты олимпиаданың ұйымдастыру комитеті ресми түрде мақұлдады. Барлық турлар халықаралық талаптарға сай өткізілді, ұйымдастырушылардың бақылауымен өтті.
Барлық қатысушылар үшін бұл – осындай ауқымдағы олимпиадаға алғашқы рет қатысуы. Сондықтан да нәтиже аса құнды: Қазақстан құрамасы екі қола медаль жеңіп алды – олардың иегерлері Тамила Турғанбаева мен Аружан Баймұхамбетова.
«Қыздарымыздың халықаралық олимпиададағы жеңісі – бұл жай ғана медаль емес. Бұл – Қазақстанда әлемдік деңгейде бәсекелесе алатын дарынды оқушы қыздардың өсіп келе жатқанын дәлелдейтін жетістік. Спорттық бағдарламалау федерациясы елдегі барлық балалар үшін мүмкіндіктер ашып, жаңа буынды IT саласына жетелеуді жалғастырады», – деді Қазақстан спорттық бағдарламалау федерациясының президенті Бағдат Мусин.
Сонымен қатар, маңызды нәтижелердің бірі – Қазақстанның ресми түрде мойындалуы: 2026 жылдан бастап еліміз EGOI-дің ресми қатысушы елдер тізіміне енгізіледі. Бұл – құрама жетекшілерінің төрт жыл бойы олимпиада Бас ассамблеясында ел мүддесін табанды қорғауының нәтижесі.
Команданың EGOI-ге қатысуына қаржылай қолдауды Федерацияның бас серіктесі – Kaspi.kz көрсетті. Бағдарламалау саласында қыздарға арналған білім мүмкіндіктерін дамытуға қосқан үлесі үшін Kaspi.kz-ке алғыс білдіреміз.
European Girls Olympiad in Informatics – жыл сайын өтетін халықаралық олимпиада. Оның мақсаты – қыздарды компьютерлік ғылымдарды оқуға ынталандыру және IT саласындағы гендерлік теңсіздікті азайту. Қазақстан бұл олимпиадаға 2021 жылдан бастап қатысып келеді, ал Федерацияның жүйелі жұмысының арқасында елімізде дарынды жас программистер қауымдастығы қалыптасып үлгерді.