Қазақстан мен Сербия ғарыш және IT салаларындағы ынтымақтастықты нығайтуда
Қазақстан Президенті Қасым-Жомарт Тоқаевтың Сербияға ресми сапары барысында Қазақстанның Цифрлық даму, инновациялар және аэроғарыш өнеркәсібі министрлігінің делегациясы екі ел арасындағы ынтымақтастықты кеңейтуге бағытталған бірқатар маңызды кездесулер өткізді.
Ең негізгі кездесулердің бірі Қазақстанның цифрлық даму министрі Жаслан Мадиев пен Сербияның ғылым, технологиялық даму және инновациялар министрі Елена Бегович арасындағы диалог болды. Келіссөздер барысында ғарыш саласындағы бірлескен ғылыми зерттеулердің перспективалары және ғарыштық технологияларды экономиканың түрлі салаларында қолдану мәселелері талқыланды.
Кездесу нәтижесінде ғарыш қызметі саласындағы ынтымақтастық туралы меморандумға қол қойылды. Құжат жерді қашықтан зондтау, спутниктерді әзірлеу және сынақтан өткізу, сондай-ақ ғарыштық технологияларды енгізу бағыттарын қамтиды. Меморандум екі елдің цифрлық экономиканы дамытуға арналған ғарыштық технологияларды қолдану саласында белсенді ынтымақтастығын көздейді, соның ішінде агробизнес мониторингі, су және жер ресурстарын басқару, сондай-ақ жер қойнауын пайдалануды жақсарту процестері қарастырылған.
Сонымен қатар, ақпараттық-коммуникациялық технологиялар (АКТ) саласындағы ынтымақтастық туралы тағы бір меморандумға қол қойылды. Бұл құжат IT секторының дамуына және Қазақстан мен Сербияның әлеуметтік-экономикалық прогресіне ықпал етуді мақсат етеді.