Қазақстан пилотсыз көлік пен электромобильдерді дамыту бағдарламасын іске қосады
Қазақстанда электромобильдер мен пилотсыз көлік құралдары нарығын дамытуға арналған бағдарлама әзірленеді, деп хабарлады цифрлық даму, инновациялар және аэроғарыш өнеркәсібі министрі Жаслан Мәдиев үкімет отырысында.
Сарапшылардың болжамы бойынша, 2035 жылға қарай пилотсыз көлік нарығының жаһандық көлемі 3 трлн АҚШ долларына жетіп, шамамен 100 есе ұлғаяды. АҚШ, Қытай және Ресей сияқты көптеген елдер пилотсыз технологияларды сәтті енгізіп жатыр. Қазақстан бұл үрдістен қалыс қалмай, тестілеу және жергілікті өндіріс үшін қолайлы орта қалыптастыруды көздейді.
Бағдарлама не қамтиды?
Пилотсыз көлік нарығын дамыту реттеуші «песочницаны» іске қосудан басталады. Оның аясында:
• Саланы реттейтін нормативтік-құқықтық актілер әзірленеді;
• Пилотсыз көліктерді нақты жағдайларда сынақтан өткізу үшін арнайы алаңдар анықталады;
• Халықаралық технологиялық компаниялармен бірлескен пилоттық жобалар жүзеге асырылады.
Қазақстан халықаралық компанияларға икемді реттеу шарттарын ұсынуға дайын. Мұндай бастамаларға Waymo (Google), Tesla, Baidu, Mobileye, Yandex және Huawei компаниялары қызығушылық танытып отыр.
Бағдарламаның стратегиялық артықшылықтары:
• Автономды көлік құралдарына арналған зерттеулер, инфрақұрылым және компоненттер өндірісіне шетелдік инвестиция тарту;
• Жоғары технологиялық салада жаңа жұмыс орындарын құру;
• Көлік саласын цифрландыру арқылы жол қозғалысының қауіпсіздігі мен тиімділігін арттыру.
Келесі қадам – тестілеу сәтті өткен соң, жобаны ұлттық деңгейде кеңейту. Жаслан Мәдиев бұл бағыттағы табысты тәжірибе ретінде БАӘ-ні мысалға келтірді. Онда WeRide және Cruise компаниялары Дубайда пилотсыз такси сынақтан өткізіп, көлік саласының цифрлық трансформациясын жеделдетуде.
Бағдарламаның алғашқы кезеңдерін алдағы жылдары іске асыру жоспарланып отыр.