Қазақстан шекарасында CarGoRuqsat электронды кезек жүйесі кеңейтілуде
Цифрландыру және шекарадағы процестердің тиімділігін арттыру аясында автомобиль өткізу пункттерінде «CarGoRuqsat» электронды кезек жүйесін енгізу жалғасуда.
Қаржы министрлігінің хабарлауынша, қазіргі таңда «CarGoRuqsat» жүйесі Қытай, Өзбекстан, Түрікменстан және Ресеймен шекарадағы өткізу пункттерінде сәтті жұмыс істеп тұр. Бұл жүйе арқылы жүргізушілер шекарадан өту уақытын алдын ала брондап, шекарадан өту процесінің жеделдігі мен ашықтығын қамтамасыз етіп, жүк көліктерінің жиналуын болдырмауға мүмкіндік алады.
КГД-де атап өткендей, «CarGoRuqsat» мемлекеттік органдардың 18 ақпараттық жүйесімен интеграцияланған, бұл тасымалдаушыларға айыппұлдар мен берешектердің бар-жоғын, тауарларды тасымалдау үшін қажетті құжаттардың рәсімделу қажеттілігі туралы алдын ала ақпарат алуға мүмкіндік береді.
Ведомствода бұл жүйенің адам факторын болдырмауға және сыбайлас жемқорлық тәуекелдерінің алдын алуға бағытталғанын атап өтті. Жүйе іске қосылған сәттен бастап Қазақстан-Ресей шекарасындағы 24 өткізу пунктінде 200 мыңнан астам жүк көлігі «CarGoRuqsat» жүйесін пайдаланды.
Оң нәтижелерге байланысты, ағымдағы жылдың сәуір–мамыр айларында Ресей Федерациясымен шекарадағы төрт ірі автомобиль өткізу пунктінде «CarGoRuqsat» жүйесін қосу жоспарлануда: «Жаңа жол» (Солтүстік Қазақстан облысы), «Қайрақ» (Қостанай облысы), «Сырым» (Батыс Қазақстан облысы), «Жайсан» (Ақтөбе облысы).
Сондай-ақ, 2025 жылы «CarGoRuqsat» жүйесі кезең-кезеңімен Қазақстан мен Қырғызстан шекарасындағы өткізу пункттерінде енгізіледі: «Сартөбе», «Аухатты», «Сыпатай батыр», «Айша бибі», «Қарасу», «Қордай» автомобиль өткізу пункттері.
Электронды кезек жүйесін пайдалану үшін:
- «CarGoRuqsat» қосымшасын жүктеп алу немесе браузер арқылы https://cgr.qoldau.kz/ru/start сілтемесіне кіру қажет;
- қажетті өткізу пунктін таңдау;
- шекарадан өту күнін және уақытын көрсету;
- жүргізуші мен автокөлік туралы мәліметтерді толтыру керек.
Барлық сұрақтар бойынша КГД Call-орталығына хабарласуға болады: 1414, 8-800-080-7777.
Бұған дейін хабарланғандай, 2025 жылғы 5 сәуірден бастап «CarGoRuqsat» электронды кезек жүйесінде жаңа ережелер күшіне енеді: мемлекеттік нөмірлері қате көрсетілген көліктердің броньдары ескерту жасалмай-ақ автоматты түрде жойылады.