Қазақстан тауарларды бақылаудың цифрлық жүйесін енгізіп жатыр
Қазақстанда «Сауданың цифрлық айнасы» жобасы жүзеге асырылуда. Бұл туралы Үкімет отырысында Сауда және интеграция министрі Арман Шаққалиев мәлімдеді.
Жоба өндірушіден бастап соңғы тұтынушыға дейінгі тауар қозғалысын толықтай цифрлық қадағалауды қамтамасыз ететін бірыңғай электронды экожүйе құруды көздейді. Бұл бірыңғай әрі ашық есеп жүйесін қалыптастыруға мүмкіндік береді.
Бүгінде 1,3 миллион тауар позициясы жіктеліп үлгерді. «Ұлттық тауарлар каталогы» мен «Электрондық тауарлар каталогын» біріктіру процесі аяқталуға жақын.
Жобаның маңызды элементтерінің бірі – тауарларды сертификаттау. Осы мақсатта техникалық реттеу жөніндегі ақпараттық жүйе – (E-КТРМ) іске қосылды. Қазіргі уақытта жүйеде 100 мыңнан астам өтініш беруші мен 1,5 мың аккредиттелген субъект тіркелген.
Жалпы, Е-КТРМ арқылы 3,5 миллионға жуық рұқсат құжаты берілді, бұл сертификаттау процесін айтарлықтай жеделдетіп, оның ашықтығын қамтамасыз етеді.