Қазақстан ұлттық геодезиялық координаттар жүйесін іске қосты
Қазақстанда өзінің геодезиялық координаттар жүйесі құрылды, оған үздіксіз жұмыс істейтін референцтік станциялар желісі (CORS) кіреді. «Ұлттық кеңістіктік деректер инфрақұрылымы» жобасы Жоғары аудиторлық палата (ЖАП) ұсынған бастама негізінде жүзеге асырылып, елдің геодезия және картография саласындағы тәуелсіздігін қамтамасыз етуге бағытталған.
Неліктен жаңа жүйе қажет?
Бұған дейін Қазақстан XX ғасырдың ортасында әзірленген координаттар жүйесін пайдаланып келді. Алайда, ол қазіргі заманғы талаптарға сай келмей, техникалық тұрғыдан ескірген еді. Мемлекеттік аудит барысында бірыңғай геодезиялық жүйенің жоқтығы сандық карталарды жасау мен мемлекеттік органдар мен бизнестің деректерін интеграциялауды қиындататыны анықталды.
Не өзгерді?
• «Ұлттық кеңістіктік деректер инфрақұрылымының мемлекеттік геопорталы» өнеркәсіптік пайдалануға енгізілді. Бұл жүйе жаңартылған картографиялық деректерге қолжетімділікті қамтамасыз етеді.
• 2025 жылғы 1 қаңтардан бастап жаңа геодезиялық жүйе – QazTRF-23 (Qazaqstan Terrestrial Reference Frame 2023) ресми түрде қолданысқа енді.
• Референцтік станциялар желісі (CORS) іске қосылды, бұл геодезиялық және картографиялық деректердің дәлдігін айтарлықтай арттырады.
QazTRF-23 Қазақстанға не береді?
Жаңа жүйенің енгізілуі геодезиялық өлшеулердің дәлдігін арттырып, келесі бағыттар бойынша жаңа мүмкіндіктер ашады:
• тиімді аумақтық жоспарлау;
• құрылыс процестерін жаңғырту;
• заманауи картографиялық және навигациялық жүйелерді дамыту;
• жер ресурстарын басқаруды жетілдіру.
Бұл қадамдар Қазақстандағы геодезия мен картографияны цифрландырудың жаңа кезеңін білдіреді. Ол экономиканың әртүрлі салалары үшін дәл және өзекті кеңістіктік деректерді қамтамасыз ететін мықты негіз қалыптастырады.