Қазақстанда электронды дәрі-дәрмек рецептілері 2025 жылдың соңына дейін енгізіледі
Қазақстанда қағаз түріндегі рецептілерді алмастыратын электронды рецептілерді толық енгізу жоспарлануда. Бұл бастаманы жүзеге асыру үшін Денсаулық сақтау министрлігі медициналық мекемелер мен дәріхана желілерін біріктіретін бірыңғай ақпараттық жүйені әзірлеуде.
Денсаулық сақтау вице-министрі Ержан Нұрлыбаевтың айтуынша, елдегі емханаларда электронды рецептілер қазірдің өзінде қолданыста:
“Электронды рецептілер емханалардың ішінде қолданыста, бар. Оларды бөлшек дәріхана желілерінде қолдану үшін бірыңғай ақпараттық кеңістікте жұмыс істеуін қамтамасыз ету қажет. Бұл жоба бойынша жұмыс белсенді жүргізілуде және біздің жоспарымыз бойынша ол 2025 жылдың соңына дейін іске асырылады.”
Қазіргі уақытта электронды рецептілер диспансерлік есепте тұрған пациенттерге тегін дәрі-дәрмек алу үшін беріледі. Мұндай дәрі-дәрмектерді пациенттер әлеуметтік әмиян арқылы дәріханалардан ала алады, бұл процесті едәуір жеңілдетіп, ыңғайлы етеді.
Бұл бастама денсаулық сақтау жүйесінің тиімділігі мен ашықтығын арттыруға, сондай-ақ медициналық мекемелер мен дәріхана желілерінің өзара әрекеттесуін жақсартуға бағытталған.