АйтарлықIT

Қазақстанда қалдықтарды басқару жүйесі цифрландырылады

Ақпарат ағыны

• 1 min read
Қазақстанда қалдықтарды басқару жүйесі цифрландырылады

Үкімет отырысында ҚР Премьер-министрі Олжас Бектенов коммуналдық және өнеркәсіптік қалдықтарды басқару, мониторинг жүргізу және бақылау жүйесін цифрландыруды тапсырды.

Елдегі қалдықтарды қайта өңдеу деңгейінің төмендігіне ерекше назар аударылды. Жыл сайын қазақстандық кәсіпорындар шамамен 1 млрд тонна қалдық шығарады, оның тек 11%-ы ғана қайта өңделеді. Ал дамыған елдерде бұл көрсеткіш 70–80%-ға дейін жетеді.

«Қазақстандық кәсіпорындар жыл сайын шамамен 1 млрд тонна қалдық шығарады. Алайда олардың тек 11%-ы ғана қайта өңделеді. Дамыған елдерде бұл көрсеткіш 70–80%-ды құрайды. Сонымен қатар, кен орындарындағы үйінділерде қымбат және сирек кездесетін металдардың қоспалары бар. Оларды алу үшін жаңа, тиімді технологияларды қолдану қажет. Энергетикалық кәсіпорындардың күл үйінділері де үнемі өсіп келеді. Барлық қалдықтарды тиімді басқару үшін нақты жүйе құрып, оны цифрландыру қажет. Дұрыс тәсіл қолданылса, қалдықтар кәдеге жаратылып, қайта өңделіп, қайта пайдаланылуы тиіс», – деді Олжас Бектенов.

Экология, өнеркәсіп, энергетика және цифрландыру министрліктеріне қалдықтарды кешенді бақылау мен есепке алуға арналған цифрлық құралдарды әзірлеу тапсырылды.

Сонымен қатар, Үкімет басшысы қазақстандық тау-кен компаниялары қалдықтарды қайта өңдеуге кіріскенін, олардың негізінде құрылыс материалдары мен тыңайтқыштарды қоса алғанда, шамамен 30 түрлі өнім шығара бастағанын атап өтті.

Жаңа цифрлық жүйе қалдықтарды кәдеге жарату процесінің ашықтығын, тиімділігін және экономикалық тиімділігін арттырып, өнеркәсіптік және коммуналдық секторда қайта өңдеудің дамуына серпін береді деп күтілуде.

TSAEKA қолдауымен