Қазақстанда халықаралық «Болашақ ойындары» өтуі мүмкін
ҚР Премьер-министрі Олжас Бектенов Phygital International ұйымының негізін қалаушысы, доктор Рене Фазель және атқарушы директоры Нис Хаттпен кездесу өткізді. Тараптар фиджитал спортты дамыту және 2026 жылы Қазақстанда халықаралық «Болашақ ойындарын» өткізу мүмкіндігін талқылады.
Фиджитал спорт — бұл физикалық белсенділік пен цифрлық технологияларды біріктіретін жаңа бағыт. Оның танымалдығы қарқынды өсіп келеді: ҚР Киберспорт федерациясының мәліметінше, Қазақстанда 1,5 миллионнан астам адам киберспортқа белсенді қатысады.
Туризм және спорт министрі Ербол Мырзабосыновтың айтуынша, турнирді өткізу бойынша дайындықтар бекітілген жоспарға сәйкес жүргізілуде. Астанада мұндай халықаралық жоғары технологиялық іс-шараны өткізу — жастар арасында жаңа спорт форматын ілгерілетудегі маңызды қадам болмақ.
Phygital International ұйымы 98 елді біріктіретін Дүниежүзілік Phygital қауымдастығымен (WPC) серіктестікте жұмыс істейді. Ұйым фиджитал пәндердің стандарттарын дамытып, әлемдік деңгейдегі турнирлерге қатысушыларды іріктеумен айналысады.
Кездесу қатысушылары Қазақстанда фиджитал спортты дамыту және ынтымақтастықты кеңейтуге қызығушылық танытты.