Қазақстанда мемлекеттік органдардың жасанды интеллектпен жұмыс істеу бойынша оқыту бағдарламасы басталды
Қазақстанда орталық және жергілікті мемлекеттік органдардың, сондай-ақ квазимемлекеттік сектор өкілдерінің қызметкерлерін оқыту бағдарламасы Ұлттық жасанды интеллект платформасы (ҰЖИП) аясында іске қосылды.
Оқыту бағдарламасы мемлекеттік қызметтер бойынша чат-боттарды тестілеу және жетілдіру, нормативтік-құқықтық актілермен жұмысты автоматтандыру және ерте әрекет ету элементтерін енгізуге бағытталған.
Оқытудың қандай міндеттері бар?
• Азаматтардың сұраныстарын талдау және мемлекеттік қызметтер бойынша чат-боттардың жауаптарының дәлдігін арттыру.
• Виза, азаматтық және консулдық қызметтер мәселелері бойынша кеңес беретін Сыртқы істер министрлігіне арналған чат-бот жасау.
• Еңбек министрлігі, Денсаулық сақтау министрлігі және мемлекеттік сатып алу саласына арналған профильді министрліктердің чат-боттарын әзірлеу.
• Чат-боттардағы нормативтік-құқықтық актілерді автоматты түрде жаңарту механизмін баптау.
Мемлекеттік процестерде жасанды интеллектті қолдану жұмысты автоматтандыруға, қызмет көрсетудің тиімділігін арттыруға және оларды азаматтар үшін қолжетімді әрі ыңғайлы етуге мүмкіндік береді.