Қазақстанда әртістерге арналған цифрлық платформа іске қосылады
2026 жылдан бастап Қазақстанда авторлық құқықтарды ұжымдық басқарудың Бірыңғай цифрлық платформасы іске қосылады. Бұл шығармашылық иелеріне өз туындыларының пайдаланылуын бақылауға мүмкіндік беретін нақты құрал болмақ. Бұл туралы әділет вице-министрі Ботагөз Жақселекова мәлімдеді.
Не өзгереді?
Композиторлар, орындаушылар, жазушылар және басқа да құқық иелері енді:
– шығармасының қашан және қай жерде пайдаланылғанын онлайн режимде қадағалай алады — мысалы, кафеде орындалған әуен не радиода оқылған үзінді;
– сыйақы есептеуді бақылап отыра алады: қанша рет қолданылды, қандай сома төленуі тиіс;
– авторлық және сабақтас құқықтарды басқаратын ұйымдардан ашық есеп ала алады.
Платформа тек авторларға ғана емес, бизнеске де пайдалы болады. Кафе, мейрамхана және басқа да мекемелер белгілі бір шығарманы қанша рет пайдаланғанын және қанша төлем төлеуі тиіс екенін көре алады. Бұл авторлар мен кәсіпкерлер арасындағы дауларды болдырмауға сеп болады.