Қазақстанда жеке деректерді қорғау шаралары қалай күшейтілуде?
Қазақстанда мемлекеттік қызметтердің сапасы мен қолжетімділігін арттыру мақсатында азаматтар мен мемлекеттік органдар арасындағы өзара іс-қимылды жақсартуға бағытталған бес жаңа цифрлық сервис енгізілді. Бұл туралы Үкімет отырысында «Азаматтарға арналған үкімет» КЕАҚ басқарма төрағасы Арман Кенжегалиев мәлімдеді.
Жаңа бастамалардың қатарында – әрбір пайдаланушыға жеке көзқарас ұсынатын «жеке менеджер» қызметі бар.
Сондай-ақ, шетелдік азаматтарды тіркеуге арналған электрондық келісім сервисі енгізілді. Енді тұрғын үй иелері жалға алушылардың уақытша тіркелуі туралы SMS-хабарлама алып отырады. Бұл пәтер иесінің рұқсатынсыз тіркеу жағдайларының алдын алуға мүмкіндік береді.
Сонымен қатар, ақпараттық жүйелер істен шыққан жағдайда азаматтардан өтініштер қабылдауға арналған сервис әзірленді. Бұл туындаған мәселелерді жедел шешуді қамтамасыз етеді.
Маңызды жаңалықтардың бірі — жеке деректерге қол жеткізуді бақылау. Бұл ХҚКО қызметкерлерінің азаматтың келісімінсіз жеке ақпаратқа қол жеткізе алмауын қамтамасыз етеді.
Сондай-ақ, жылжымайтын мүлік иелерін барлық тіркеу әрекеттері туралы автоматты түрде хабардар ету сервисі іске қосылды. Ол хабарламаларды электрондық үкімет порталындағы жеке кабинетке жібереді. Өткен жылы бұл жүйе арқылы 6 миллионнан астам хабарлама жолданған.