Қазақстанда жеке деректерді заңсыз сату схемасы әшкереленді
Қазақстан Республикасының Ішкі істер министрлігі Ұлттық қауіпсіздік комитетімен бірлесіп, қазақстандықтардың жеке деректерін заңсыз алумен және сатумен айналысқан ауқымды қылмыстық топтың әрекетіне тосқауыл қойды.
ІІМ мәліметінше, қылмыскерлер мемлекеттік деректер базасына заңсыз қол жеткізіп, азаматтар туралы құпия ақпаратты алған. Бұл деректер кейін Telegram-арналар арқылы таратылып, кейбір коллекторлық компанияларға берілген. Ақпараттың таралу ауқымы көп адамды қамтып, цифрлық қауіпсіздікке қатер төндірді.
Бірлескен операция барысында 140-тан астам адам, оның ішінде бір компанияның иелері мен Telegram-арналардың әкімшілері ұсталды. Бес негізгі күдікті қамауға алынды. Коллекторлық фирмалардың кеңселерін тінту кезінде деректерді сақтау және өңдеу үшін пайдаланылған 400-ден астам компьютер және басқа техника тәркіленді.
Барлық қатысы бар тұлғаларды анықтау жұмыстары жалғасуда. ІІМ цифрлық қауіпсіздік саласындағы заң бұзушылықтар мен деректердің таралуына жол бермеу жұмысын жалғастырмақ.