Қазақстандық бұлтты провайдер PS Cloud Services ауқымды DDoS-шабуылға ұшырады
5 ақпанда PS Cloud Services қызметтеріне ірі DDoS-шабуыл жасалып, бұл компанияның сайт хостингі мен бұлтты инфрақұрылымына әсер етті. Соның салдарынан қазақстандық бірқатар сайттарға кіруде қиындықтар туындады.
Шабуыл туралы не белгілі?
Шабуыл 5 ақпанда 16:50-де басталып, 6 ақпан 01:00-ге дейін жалғасты. Шабуылға бұлтты серверлер, объектілік сақтау жүйесі, VPS-хостинг және Virtuozzo Application Platform ұшырады. Провайдер командасы белсенді түрде шабуылды тойтарып, салдарын жоюмен айналысты. 01:00-де барлық қызметтер толық қалпына келтірілді.
Компания мамандары келешекте қауіп-қатерді барынша азайту үшін қорғаныс жүйесін нығайтуды жалғастыратынын мәлімдеді.