АйтарлықIT

Қазақстандық финтех-стартап жаңа нарықтарға кеңею үшін $1,5 млн инвестиция тартты

Ақпарат ағыны

• 2 min read
Қазақстандық финтех-стартап жаңа нарықтарға кеңею үшін $1,5 млн инвестиция тартты

Қазақстандық Prosper Pay финтех-стартапы Pre-Series A инвестициялық кезеңінде қаржы тартып, халықаралық деңгейде кеңеюге дайындалуда. Инвестициялық раундты Мурат Абдрахманов басқарды, сондай-ақ Rakhimbayev Family Office Ltd., Асқар Достияров және Ермек Ашкенов инвестор ретінде қатысты. Жобаны MA7 Angels Club инвесторлары да қолдады.

Prosper Pay қарқынды даму көрсетіп, Қазақстандағы Earned Wage Access (EWA) сегментінде жетекші орын алады. Өткен жылы компанияның табысы 10 есеге, ал пайдаланушылар саны 20 есеге өсіп, 52 мың адамға жетті. Платформаға Magnum, Заммлер Қазақстан, Raimbek Group және Jumis Go сияқты 40-тан астам компания қосылған.

«Бұл раунд – біздің стратегиямызға және өніміміздің үлкен әлеуетіне деген инвесторлардың сенімінің дәлелі. Біз қазірдің өзінде Prosper Pay нақты мәселені шешетінін дәлелдедік, енді қызметімізді кеңейтіп, оны бұдан да көп компаниялар мен қызметкерлер үшін қолжетімді етеміз», – деп түсіндірді Prosper Pay бас директоры Бейбұт Жантөрин.

Prosper Pay жұмыс берушілерге кадрлық тұрақтылықты қамтамасыз етуге көмектеседі

Жоба серіктестері Prosper Pay енгізілгеннен кейін кадрлардың тұрақсыздығы азайып, бос жұмыс орындарын жабу уақыты қысқарғанын атап өтуде.

«Қызметкерлерден алынған пікірлер олардың алдын ала жалақы алу мүмкіндігін жоғары бағалайтынын көрсетті. Бұл мүмкіндік ұзақ келісімдер мен күту уақытын болдырмайды. Біз кадрлық тұрақсыздықты төмендету – бірнеше факторлардың әсерінен болатынын түсінеміз. Дегенмен, Prosper Pay әлеуметтік пакеттің маңызды бөлігіне айналды», – дейді Заммлер Қазақстан компаниясының HR-директоры Салтанат Жүнісова.

Тартылған инвестициялардың арқасында Prosper Pay өнімді жылдам жетілдіріп, Орталық Азия мен Кавказ нарықтарына шығуды жоспарлап отыр. Сондай-ақ, компания қаржылық шешімдер экожүйесін кеңейтуді көздейді. Жоспарда – HR-жүйелермен, бухгалтерлік платформалармен интеграциялау және бизнеске жалақы төлемдерін тиімді басқаруға көмектесетін қосымша функцияларды іске қосу бар.

MA7 Angels Club стартапты қолдауға дайын

«Prosper Pay – мықты команда мен айқын бизнес-модельдің өңірлік инвесторлар тарапынан қолдау тапқанын көрсететін жақсы мысал. Бұл мәміле біздің MA7 Angels Club-тың басты мақсаттарының бірін айқын көрсетеді – жергілікті стартап негізін қалаушыларға өңірлік инвесторлардың көмегімен ірі инвестициялық раундтарды тартуға көмектесу, сондай-ақ инвесторларға талантты кәсіпкерлермен танысып, олардың дамуына үлес қосу мүмкіндігін беру», – деп атап өтті MA7 Angels Club негізін қалаушы және инвестициялық раундтың жетекшісі Мурат Абдрахманов.

Prosper Pay – Қазақстандағы Earned Wage Access (EWA) нарығының көшбасшысы

Еске сала кетсек, Prosper Pay – Қазақстандағы жетекші финтех-стартаптардың бірі. Ол қызметкерлерге жалақыны алдын ала алуға мүмкіндік беретін Earned Wage Access (EWA) сервисін дамытуда. Платформа қызметкерлерге өз еңбекақыларына бірден қол жеткізуге мүмкіндік береді, бұл олардың қаржылық күйзелісін азайтып, жұмыстан қанағаттану деңгейін арттырады. Сондай-ақ, Prosper Pay жұмыс берушілерге қызметкерлерді ұстап қалуға, кадр тұрақсыздығын төмендетуге және жалдау процесін жылдамдатуға көмектеседі.

TSARKA қолдауымен