АйтарлықIT

Қазақстандық «Малай» фильмі — наурыз айының басты отбасылық хиті

Ақпарат ағыны

• 2 min read
Қазақстандық «Малай» фильмі — наурыз айының басты отбасылық хиті

Қазақ көрермені отандық «Малай» комедиясын екі апта қатарынан  кинотеатрлардан үзбей тамашалауда. Наурыз мерекесі күндері бұл фильм елдің әр өңіріндегі кинозалдарда аншлагпен көрсетілді.

Картинаның сәтті шығуына басты себеп – ұлттық болмысты заманауи әрі баршаға түсінікті тақырыппен шебер үйлестіре алғаны. Қазақтың әуені, киім үлгілері мен салт-дәстүрін көрермен жылы қабылдады, ал туындының жанұялық форматта ұсынылуы оны түрлі буын өкілдеріне жақын ете түсті. Фильмнің бас продюсері Бексұлтан Қазыбектің айтуынша, көрермен тек қызығушылық танытып қана қоймай, қызығушылығын үдете түскен. 

«Біз үшін "Малай" – жай ғана "Холоп" фильмінің қазақша нұсқасы емес, өз алдына жеке, көрерменге таныс әрі жақын кейіпкерлермен жасалған шынайы оқиғаға айналуы маңызды болды. Қарапайым, күлкілі әзілдер, актерлердің сенімді ойыны мен әсерлі музыка – барлығы бірігіп, ерекше атмосфера туғызды. Әсіресе, бүкіл отбасымен келіп көріп жатқан көрермендерді көргенде, мақсатымыз орындалғанын сеземіз. Біз дәл осындай – жылы, шынайы, барша буынға түсінікті отбасылық кино жасағымыз келген еді», – дейді продюсер.

Оң пікір тек көрермендердің ғана емес, кәсіби сыншылар тарапынан да айтылып жатыр. Киносыншылар «Малайдың» күлкі сыйлауымен қатар, қоғамдағы өзекті мәселені де көтеріп отырғанын атап өтті. Мұндай әсерді комедия мен әлеуметтік сатираның үйлесімі туғызған.

Фильмнің сценаристі Абдусаид Шайхисламұлы былай деп түсіндірді: «Сценарий жазу барысында біз комедияның ішіне қоғамымыздың шынайы болмысын енгізуге тырыстық. Бұл фильм тек көңіл көтеру үшін емес, көрермен өзін танитын, ойға қалдыратын элементтерімен де ерекшеленсе дедік. Қазақ қоғамындағы күнделікті өмірдің өзі бізге бай материал болды. Сол шынайылық арқылы "Малай" өз көрермендерін тауып отыр деп ойлаймын».

Жас актерлер мен танымал блогерлер ойнаған басты рөлдерді режиссер Ернар Нұрғалиев үйлестіріп шыққан. Ол «Жаным, ты не поверишь», «Келінжан», «Жездуха» сынды жобаларымен танылған. Бұл жолы көрермен Жеңіс Омаров (Zheka Fatbelly), Аида Құрманғалиева, Хамит Ердеханов, Ермек Шынболатов пен Сабина Мовлаеваның ойынын көре алады. Сонымен қатар, тәжірибелі актерлер Дулыға Ақмолда, Лаура Мырзахметова мен Жандарбек Садырбаев та фильмге қатысқан.

Фильмнің танымалдығы тек кассалық табыспен қана емес, түсірілім тобына деген ерекше қызығушылықпен де көрінеді. Промо-тур аясында түсірілім ұжымы еліміздің бірнеше қаласын аралап, Алматы, Астана, Шымкент, Тараз және Өскеменде көрермендермен кездесті. Әр қалада оларды жылы қарсы алған жұрт әсерлерімен бөлісіп, әсерлі сәттерін талқылады. Түсірілім тобы сұрақтарға жауап беріп, естелік суреттерге түсіп, қызықты жайттарды әңгімеледі.

Көрермен ықыласы, толы залдар мен жоғары кассалық көрсеткіштер «Малайды» наурыздың ең танымал отбасылық фильміне айналдырды. Unico компаниясы мен «Қазақфильм» киностудиясының бірлесіп жасаған бұл туындысы 13 наурыздан бастап үлкен экрандарда көрсетіліп жатыр. Көріп үлгеріңіз!

TSARKA қолдауымен