Қазақстандық QazTWIN стартапы халықаралық Demo Day Constructor шарасында арнайы жүлдеге ие болды
Германияда өткен Constructor Demo Day аясында өнеркәсіптік цифрландыру саласындағы инвесторлар мен сарапшылардың назарын Қазақстаннан шыққан QazTWIN стартапы аударды. Жоба KazScanService компаниясына тиесілі және көрермендер дауыс беруі нәтижесінде арнайы жүлдеге ие болды — Constructor University жанындағы Кәсіпкерлік және инновациялар орталығының директоры Дмитрий Куриннен 10 сағаттық менторлық қолдау.
QazTWIN — бұл өнеркәсіптік нысандардың нақты уақыттағы 3D-көрінісін жасайтын озық цифрлық егіз жүйесі. Зауыттың барлық элементтері: өндірістік желілерден бастап инфрақұрылымның ұсақ бөлшектеріне дейін визуализацияланады.
Жүйе өзіндік AI-ассистентпен бірге мына мүмкіндіктерді ұсынады:
● кәсіпорынның ағымдағы жағдайы туралы толық ақпаратты бір сәтте алу;
● ықтимал ақауларды алдын ала болжау;
● нақты деректер мен талдау негізінде басқарушылық шешімдер қабылдау.
Қарапайым тілмен айтқанда, QazTWIN кәдімгі зауытты «ақылды» цифрлық кеңістікке айналдырады, мұнда басқару барынша ашық әрі тиімді болады.
Стартап Astana Hub өңірлік IT-хабының қатысушысы болып табылады және қазіргі таңда өз шешімін Қазақстан мен басқа елдердің кәсіпорындарында белсенді түрде енгізуде.
Constructor Demo Day 10 маусым күні Германияның Бремен қаласындағы Constructor University кампусында өтті және Constructor Start акселерациялық бағдарламасының бір бөлігі болды — бұл технологиялық стартаптарды ерте кезеңде қолдауға бағытталған жаһандық бастама. Бағдарлама Constructor Capital мен Constructor University жанындағы Кәсіпкерлік және инновациялар орталығының серіктестігімен жүзеге асырылады.
Бағдарламаға қатысу үшін B2B SaaS, Deeptech және Edtech салаларындағы 3500-ден астам стартап өтінім берді. 150-ден астамы онлайн іріктеуден өтті, ал тек 32 команда сегіз апталық интенсив пен жеке менторлықты қамтитын офлайн бағдарламаға шақырылды. Финалға 11 елден келген 15 үздік стартап іріктеліп алынды, олардың қатарында Қазақстан да бар.
Constructor Start бағдарламасы стартаптарға $1 млн-ға дейін инвестиция, Constructor Tech зерттеу платформасына қол жеткізу, сондай-ақ серіктестерден бонустар ұсынады. Соның бірі — Nexford университетінің “From Idea to Pitch” курсы.
QazTWIN жобасының қатысуы Қазақстанның жаһандық технологиялық картасындағы орнын барған сайын айқындай түсуде.