Қазақстанға жоғары білікті IT-мамандар тартылуда
Цифрлық даму министрі Жаслан Мәдиев Үкімет отырысында Қазақстанды жоғары білікті IT-мамандар үшін тартымды ету бағытында жүргізіліп жатқан жұмыстар туралы баяндады.
Министрдің айтуынша, шетелдік IT-мамандарды елге тарту және оларды жергілікті экожүйеге интеграциялау мақсатында Digital Nomad Residency және Digital Nomad Visa бағдарламалары іске қосылған.
Digital Nomad Residency бағдарламасы шетелдіктерге Қазақстанда онлайн форматта тұруға рұқсат алуға мүмкіндік береді. Бұрын бұл үшін елге келу, ЖСН мен ЭЦҚ алу, табысын растау қажет болатын. Қазір барлық процесс қашықтан өтеді — өтінімдер astanahub.com және egov.kz арқылы қабылданады. ЖСН мен ЭЦҚ шетелдегі консулдықтарда рәсімделеді, ал табыс туралы құжат талап етілмейді. Бұл шетелдік IT-мамандардың елге келуі мен заңдастырылуын едәуір жеңілдетті.
Digital Nomad Visa — бұл цифрлық көшпенділерге арналған арнайы виза. Ол Қазақстанда өз мамандығы бойынша бір жылға дейін жұмыс істеуге, әрі қарай ықтиярхат алуға мүмкіндік береді. Бұл — цифрлық мамандардың еңбек қызметін алғаш рет заңдастыратын құрал.
Бүгінгі таңда осы бағдарламалар аясында 204 өтінім қабылданып, алғашқы визалар Алжир мен Ботсвана азаматтарына берілді.