Қазақстанның ІІМ-де полицейлердің жұмысын бағалау үшін цифрлық рейтинг енгізілді
Қазақстан Республикасы Ішкі істер министрлігі ішкі істер органдарына қызметке қабылдау, тағайындау, ауыстыру және қызмет бойынша ілгерілету тәртібіне өзгерістер енгізді. Негізгі жаңалықтардың бірі – енді қызметкерлердің мансаптық өсуіндегі бәсекеге қабілеттілігін бағалау үшін цифрлық рейтинг қолданылатын болады.
Жаңа ережелерге сәйкес:
● Қатардағы, кіші және орта басшылық құрамдағы лауазымдарға қабылдау барлық кандидаттардың деректері тіркелетін ақпараттық автоматтандырылған дерекқор арқылы жүзеге асырылады.
● Кадрлық резервке алынғаннан кейін бір ай ішінде қызметке тағайындау жүзеге асырылады – сынақ мерзімінсіз (бұл өзгеріс 2026 жылғы 1 қаңтардан бастап күшіне енеді).
● Жоғары басшылық лауазымдарға тағайындау үшін енді ең жоғары цифрлық рейтинг жинаған кемінде бес кандидат қаралуы тиіс.
Сондай-ақ, қызметкерді тағайындау, ауыстыру немесе қызметтен босату туралы ұсыныс нысаны жаңартылды — енді онда әр полицейдің жеке рейтингі көрсетілетін болады.
Бұл жаңашылдық ІІМ жүйесінде мансаптық өсудің ашықтығы мен тиімділігін арттыруға бағытталған.