Әкімдіктерге базалық станциялар орнатуға арналған орындарды бөлу тапсырылды
Үкімет отырысында Премьер-Министр әкімдіктерге байланыс базалық станцияларын орнату үшін кез келген қолайлы нысандардан орын бөлу жөнінде тапсырма берді.
«Елді мекендерде байланыс пен интернет сапасы төмен аймақтарды жою үшін өңір әкімдіктеріне байланыс операторларына базалық станциялар орнатуға орын бөлуге, соның ішінде кез келген қолайлы нысандарды пайдалануға көмектесуді тапсырамын», — деді Олжас Бектенов.
Сонымен қатар Премьер-Министр байланыс инфрақұрылымын салу кезіндегі артық бюрократиялық кедергілерді жою қажеттігін атап өтті.
Себебі бір ғана антенна-мачта құрылымын орнату процесі кейде бір жылға дейін созылады.
«Жаппай цифрландыру жағдайында бұл процестерді оңтайландырып, айтарлықтай жеделдету қажет. Осы мәселе бойынша бір ай мерзімде нақты ұсыныстар әзірлеуді Жасанды интеллект министрлігіне, Индустрия және құрылыс министрлігімен және байланыс операторларымен бірлесіп тапсырамын», — деп атап өтті Премьер-Министр.