QazTrade қазақстандық тауарлардың Alibaba, Noon және TikTok Shop платформаларында экспортын күшейтуде
Бүгін Орталық коммуникациялар қызметінде өткен брифингте «QazTrade» сауда саясатын дамыту орталығының бас директоры Айтмұхамед Алдажаров қазақстандық компаниялардың жетекші халықаралық электрондық сауда платформаларында қатысуын кеңейтуге бағытталған стратегиялық бастамаларды таныстырды.
Атап айтқанда, QazTrade отандық өндірушілердің JD.com, Alibaba.com, Europages, Noon және TikTok Shop сияқты платформаларға қатысуын арттыруды жоспарлап отыр. Бұл қазақстандық компанияларға жаңа нарықтарға шығуға және экспорттық табысты ұлғайтуға мүмкіндік береді.
Өз баяндамасында Алдажаров қазақстандық компаниялардың танымал e-commerce платформаларында қатысуын кеңейтудің маңыздылығын атап өтіп, QazTrade тәжірибесін стримингтік сату саласында бөлісті.
QazTrade мәліметтері бойынша, 2024 жылы әлемдегі онлайн-сатып алушылар саны 2,71 миллиард адамға жетті, ал жаһандық электрондық сауда нарығының көлемі 6,3 триллион АҚШ долларына бағаланды, бұл 2023 жылмен салыстырғанда 8,76% жоғары. Қазақстанда бөлшек сауда құрылымындағы электрондық сауданың көлемі 3,2 триллион теңгені немесе жалпы тауар айналымының 14,5%-ын құрады.
Сонымен қатар, болжам бойынша 2029 жылға қарай әлемдегі онлайн-сатып алушылар саны 3,6 миллиард адамға жетеді, интернет арқылы сауда жасау деңгейі 49,1%-ға, ал бір пайдаланушыға орташа табыс 1 728 АҚШ долларына өседі. Сарапшылардың болжамына сәйкес, нарықтағы ең үлкен үлесті Қытай сақтап қалады, бұл бағыттағы күш-жігерді арттырудың маңыздылығын көрсетеді.
Осылайша, электрондық сауда Қазақстанның экспорттық саясатының маңызды элементі болып қала бермек, ал QazTrade отандық компаниялардың халықаралық аренадағы позицияларын нығайту бағытында белсенді жұмыс жүргізуде.