Samsung Қазақстанда жасанды интеллект функциялары бар кір жуғыш машиналар өндірісін іске қоспақ
Silk Road Electronics компаниясы мен Оңтүстік Кореяның Samsung Electronics корпорациясы Қазақстандағы Silk Road Electronics өндірістік алаңында автомат кір жуғыш машиналарды өндіруді жергіліктендіру бойынша стратегиялық серіктестік орнатқандарын жариялады.
Бұл келісім елдің машина жасау саласының дамуы мен жаһандық технологиялық ынтымақтастықтың жаңа кезеңін білдіреді. Silk Road Electronics базасында Samsung-тың қатаң сапа стандарттарына сай келетін кір жуғыш машиналар өндірісі жолға қойылады. Өндірістің барлық кезеңдерінде сапа бақылауы қамтамасыз етіледі.
Болашақ өнімдер энергия үнемділігі, сенімділік және қауіпсіздік бойынша әлемдік талаптарға сай болады, сондай-ақ жасанды интеллект (AI) негізіндегі инновациялық функциялармен жабдықталады.
Осылайша, Samsung Қазақстандағы өндірістік қатысуын нығайтып, елді тұрмыстық техниканы шығаратын маңызды өңірлік хабқа айналдыруды жалғастыруда.
Қазақстандағы Samsung интеллектуалды кір жуғыш машиналарының жергіліктендірілген өндірісін іске қосу 2025 жылдың екінші жартыжылдығына жоспарланған. Бастапқы кезеңде өнім ішкі нарыққа бағытталады, бірақ болашақта шетелдік нарықтарға шығу мүмкіндігі де қарастырылған.