Қазақстан қалаларындағы «ақ дақтармен» күресу үшін VoWiFi технологиясы енгізіледі
Қазақстанда 2026 жылы кез келген қолжетімді Wi-Fi желісі арқылы дауыс қоңырауларын шалу мен қабылдауға мүмкіндік беретін VoWiFi технологиясын жаппай іске қосу жоспарлануда. Бұл инновациялық шешім тұрғын және кеңсе ғимараттарындағы әлсіз ұялы байланыс аймақтары — «ақ дақтар» мәселесін жоюға мүмкіндік береді. Бұл туралы Үкімет отырысында байланыс операторларының өкілдері хабарлады.
«VoWiFi технологиясы Wi-Fi арқылы дауыс қоңырауларын шалуға мүмкіндік береді. Біз қызметкерлер арасында сәтті пилоттық жобаны өткіздік, ал келесі жылы технология кеңінен қолжетімді болады», — деді «Кар-Тел» компаниясының атқарушы директоры Евгений Настрадин.
Сала өкілдерінің айтуынша, халықтың 99%-ы 4G байланысымен қамтылғанына қарамастан, «ақ дақтар» мәселесі әлі де өзекті. Негізгі себептер — жаңа ғимараттардың белсенді салынуы салдарынан сигналдың әлсіреуі және қолданыстағы базалық станциялардың жиі бұзылуы.
Әкімдіктерге базалық станциялар орнатуға арналған орындарды бөлу тапсырылды
Үкімет отырысында Премьер-Министр әкімдіктерге байланыс базалық станцияларын орнату үшін кез келген қолайлы нысандардан орын бөлу жөнінде тапсырма берді.
Сонымен қатар Премьер-Министр байланыс инфрақұрылымын салу кезіндегі артық бюрократиялық кедергілерді жою қажеттігін атап өтті.
Себебі бір ғана антенна-мачта құрылымын орнату процесі кейде бір жылға дейін созылады.