Қазақстан Expo 2025 көрмесінде донорлық органдарды сақтау жүйесін таныстырды
Жапонияның Осака қаласында өтіп жатқан Expo 2025 дүниежүзілік көрмесінде UMC Жүрек орталығының командасы Қазақстанның бірегей медициналық жаңалығын — ALEM (Astana Life Ex-situ Machine) құрылғысын ұсынды. Бұл жүйе донорлық ағзаларды, соның ішінде жүректі ұзақ уақыт сақтап, тасымалдауға арналған және оларды 24 сағаттан астам уақыт бойы тіршілікке қабілетті күйде ұстауға мүмкіндік береді. Салыстыру үшін айтсақ, дәстүрлі әдістермен ағзалар небары 4–6 сағатқа ғана сақталады.
ALEM ағза ішіндегі ортаға барынша жақын жағдайларды жасайды: температураны тұрақты ұстап, қанды оттегімен қанықтырады және негізгі физиологиялық көрсеткіштерді нақты уақыт режимінде үздіксіз бақылайды. Жасанды ортада донорлық ағзаларды тек сақтап қана қоймай, емдеуге де болады, бұл трансплантацияның сәтті өту мүмкіндігін арттырады.
ALEM жобасы бірнеше жыл бойы жасалды. Оған Жүрек орталығының кардиохирургтері, инженерлері, перфузиологтары, анестезиологтары, морфологтары және басқа да мамандары жұмылдырылды. Құрылғы жануарларға жүргізілген доклиникалық сынақтардан сәтті өтті, келесі кезең — клиникалық зерттеулер.
Expo 2025 көрмесіне қатысуға мүмкіндік берген — Қазақстандағы медициналық технологиялар мен білім беру бастамаларын қолдайтын Heart Center Foundation қоғамдық қоры. ALEM құрылғысы Қазақстан павильонында, «Connecting Lives» аймағында ұсынылды. Бұл аймақ көрменің басты тақырыбына — «Өміріміз үшін болашақ қоғамды жобалау» ұранымен үндеседі.
ALEM құрылғысының авторларының бірі, Жүрек орталығының кардиохирургия департаментінің директоры Тимур Лесбековтың айтуынша, бұл құрылғы — нағыз технологиялық серпіліс, ал оның пайда болуы — дәрігерлер, ғалымдар мен инженерлердің бірлескен еңбегінің нәтижесі.