Қазақстан жаңалықтары

Қазақстанда венчурлік индустрияның Әдеп кодексі қабылданды

Ақпарат ағыны

• 1 min read
Қазақстанда венчурлік индустрияның Әдеп кодексі қабылданды

Astana Hub халықаралық технопаркі алаңында венчурлік индустриясының Әдеп кодексіне қол қою рәсімі өтті. Бұл -  венчурлік қорлар, инвесторлар, бизнес-періштелер мен стартаптардың басын қосатын негізгі құжаттың бірі болмақ.

Activat VC бас директоры Марат Төлібаевтың айтуынша, құжатта әдептілік, адалдық, жауапкершілік, сенім, толеранттылық, парасатты бәсекелестік, стартаптар қызметіне инвесторлардың араласпауы, стартап мүдделерін қорғау, заңдылық, сыбайлас жемқорлыққа төзбеушілік және қоғамдық тарап басымдығы сияқты қағидаттар қамтылған.

 «Венчурлік кодексті құру идеясы ойымызда әуелден болды. Америка нарығында стартаптардың инвесторлар мен жұртшылықты адастырған жағдайлар орын алған еді. Осылайша, бүкіл венчурлік нарықтың имиджіне нұқсан келді. Қазақстанда мұндай жағдайдың алдын алу мақсатында осы Кодексті құруды ұйғардық. Ол – ерікті, тәртіп санкциялары және заңды күші жоқ. Бірақ мұндағы адалдық, әдептілік, ашықтық және толеранттылық нормаларын сақтауға қол қойып, жария міндеттеме алу айтарлықтай серпін береді», – деді Марат Төлібаев.

Салтанатты шарадан кейін құжатқа қол қойғандар Әдеп кодексі туралы пікірлерін ортаға салды. Олардың айтуынша, кодекстегі нормалар Қазақстан венчурлік нарығында өзара сенім, ізгі ниет пен ынтымақтастықты қалыптастыруға ықпал етеді.

«Кодекс Қазақстанда этикалық және ашық венчур нарығын құру жолындағы маңызды қадам болмақ. Осы нормаларды сақтап, IT-кәсіпкерлікті дамыту және жаңа инвестициялар тарту үшін қолайлы жағдайлар жасай аламыз. Нарықтың барлық қатысушысы кодекске қол қойып, оның қағидаттарын ұстанады деп үміттенеміз», – деді Таңат Өскембаев.

Айта кетейік, қол қою рәсіміне Astana Hub, BGlobal VC, MOST Ventures, MyVentures, Tumar Venture Fund, Activat VC, BigSky Capital, BYB Capital, InDrive NewVentures, сондай-ақ EasyTap, ApartX, Garderob, Porte, Smartestprep, GoDays, Billz стартаптары қатысты.

TSARKA қолдауымен