Қазақстандық өнімдер Amazon және Walmart платформаларына шықты
Қазақстандық азық-түлік АҚШ-тың ең ірі онлайн-платформаларында — Amazon және Walmart-та пайда болды, деп хабарлады ҚР Сауда және интеграция министрлігі.
Алғаш болып алаңдарда ұн жеткізілімі ұсынылды. Нью-Йоркке 50 тонна бидай ұны жөнелтілді, ол америкалық наубайханаларда және онлайн сатылады: Amazon-да салмағы 1,36 кг қаптама $14,5 бағасымен (килограмына шамамен $10,6) ұсынылған. Әр қаптамада шығу тегі көрсетілген — Product of Kazakhstan.
Ұзақ мерзімді келісімшарттар жасалған жағдайда, жеткізілім көлемін айына 100 тоннадан артық деңгейге дейін ұлғайту жоспарланып отыр. Қазіргі уақытта мейрамханаларға, кофеханаларға, жергілікті қоғамдық тамақтану желілеріне жеткізу, сондай-ақ АҚШ-тың ең ірі бөлшек саудагерлері — Costco, Whole Foods және Trader Joe’s сөрелеріне шығу туралы келіссөздер жүргізілуде.
Ұннан бөлек, АҚШ-та қазақстандық басқа да өнімдер таныстырылды — қарақұмық, гранола, талқан, шоколад және какао.