Қазақстанның ғылыми қауымдастығы мемлекеттік қолдау шараларына бірыңғай терезе арқылы қол жеткізе алады
Цифрлық даму, инновациялар және аэроғарыш өнеркәсібі министрі Жаслан Мәдиев Қазақстанда Astanahub.com базасында «Ұлттық инновациялық жүйенің бірыңғай терезесі» цифрлық платформасы құрылғанын хабарлады.
Жаңа платформа ғалымдар, стартаптар және бизнес үшін барлық негізгі мемлекеттік қолдау шараларын бір жерде біріктіреді, инновациялық және ғылыми қауымдастық үшін eGov аналогы ретінде қызмет етеді.
«Ұлттық инновациялық жүйенің бірыңғай терезесі әртүрлі пайдаланушылардың қажеттіліктерін ескере отырып, ғалымдар, стартаптар мен бизнес бір цифрлық платформада қолдау алып, тиімді өзара әрекеттесе алатындай шешімдер ұсынады», – деп атап өтті Жаслан Мәдиев.
Министр сондай-ақ Astana Hub экожүйесі ғылыми базасы мықты deep tech стартаптарын тартқанын ерекше атап өтті. Олардың кейбірі коммерцияландыруға қол жеткізіп, 10,6 миллиард теңгеден астам табыс тауып, жүздеген жаңа жұмыс орнын құрды.