Илон Маск Grok-3 моделін таныстырды
xAI компаниясы жаңа флагмандық Grok 3 жасанды интеллект моделін шығарды. Масктың айтуынша, ол алдыңғы нұсқасына қарағанда бірнеше есе қуаттырақ. Grok 3 математика, бағдарламалау және ғылыми тапсырмалар бойынша GPT-4o, Claude 3.5 Sonnet, Gemini-2 Pro және DeepSeek-V3 модельдерінен озып түсті.
Grok 3 Colossus гигакомпьютерінде дайындалды, онда 200 000 Nvidia H100 чипі бар. Бұл алдыңғы нұсқамен салыстырғанда есептеу қуатын 10 есеге арттырды.
Жаңа мүмкіндіктер: Grok 3 Reasoning және DeepSearch
xAI сондай-ақ Grok 3 Reasoning моделін ұсынды – бұл күрделі логикалық ойлау үшін мамандандырылған жүйе. Ол жауап бермес бұрын сұранысты тереңірек талдайды, ал Big Brain режимі қиын есептеулерді орындауға мүмкіндік береді.
Ең басты жаңашылдықтардың бірі – DeepSearch жүйесі. Бұл интернетті нақты уақыт режимінде талдайтын интеллектуалды іздеу құралы. Ол күрделі сұрақтарға нақты жауаптар береді және егер ақпарат желіде жоқ болса, дәлелді болжам жасайды.
Презентация кезінде Grok 3 физикалық есепті шешіп, Tetris пен Bejeweled элементтерін біріктіріп, жаңа ойынды нақты уақыт режимінде жасады. Маск бұл мүмкіндікті “ЖИ-ойын студиясы” деп атады.
Қолжетімділігі мен болашақ жоспарлар
Қазір Grok 3 X Premium+ жазылушыларына айына $22 бағасымен қолжетімді. Болашақта SuperGrok ($30/айына) тарифі іске қосылады, онда DeepSearch пен кескін генерациялау функциялары кеңейтілмек.
Алдағы бір аптада дауыс режимі, ал бірнеше апта ішінде бизнеске арналған API іске қосылады.
Сонымен қатар, xAI Grok 3 тұрақтанғаннан кейін Grok 2-нің ашық бастапқы кодын жариялайтынын мәлімдеді. Бұл Масктың ашық әзірлемелер саясатына сай жүзеге асырылмақ.